Matarblogg Beggu

Estagonkjúlli í ofni

2012-01-28T08:32:00.000-08:00

Kært krydd hefur mörg nöfn... og það á vissulega við um Estragon sem einnig er kallað dragon og/eða tarragon. Held að þetta krydd þekkist kannski betur sem "bernaise-sósu-kryddið" ;)

Það er til bæði ferskt og þurrt og má nota hvoru tveggja í þessari uppskrift. Seinast gerði ég með fersku og núna er þurrkryddsósukjúllinn að malla í ofninum þannig að ég læt reyna á báðar gerðir.

Ekta góður rjómasósukjúlli !

Estragonkjúlli

1 kjúlli, bútaður niður eða bara kjúklingabringur

1 msk smjör

1-2 schalottlaukur, sneiddur fínt

5 dl vatn

1 kjúklingakraftsteningur (eða samsvarandi fljótandi)

2 dl rjómi að eigin vali (ég hef notað bæði hafrarjóma og þeytirjóma)

1 msk dijonsinnep

1 krukka estragon ferskt (fínhakkað) eða rúmlega 1 tsk þurrt

1,5 msk sítrónusafi

Hitaðu ofn að 250 gráðum ef þú ert með beinlausa kjúllabita, 220 ef leggi/bein

Byrjaðu á að steikja kjúllabitana uppúr smjörinu þartil hann nær smá lit á öllum hliðum. Skelltu svo lauknum útí og leyfðu að ná smá lit, cirka 1 min. Settu nú kjöt og lauk í ofnfast form. Ekki skola úr pönnunni heldur skelltu bara vatninu og kraftinum útí og leyfðu að sjóða aðeins upp. Síðan rjómanum og estragoninu. Ef þú ert að nota ferskt máttu byrja á að setja helmingin úti og notar hinn helmingin að dreifa yfir þegar komið er útúr ofninum. Þurrt krydd seturu bara allt í einu. Bætti líka við sítrónusafanum og sinnepinu. Leyfðu sósunni aðeins að ná upp suðunni og helltu svo herlegheitunum yfir steiktu kjúklingabitana í forminu. Inní ofn þartil fullsteikt. Beinlaust tekur það svona 10-15 mín en ég leyfi því að vera allt að hálftíma ef ég er með leggi eða stóra bringubita. Það sýður í rjómasósu svo það er ekkert rosa mikil hætta á að verða þurrt.

Borið fram með valfríu meðlæti. Hér á bæ þýðir það pasta fyrir börnin og soðið blómkál fyrir fullorðna fólkið (a'la LCHF/GI ;) )

Lax í saffransósu

2012-01-04T10:04:00.000-08:00

Þessi laxaréttur er svo góður að ég verð barasta að íslenska hann svo hann fari nú ekki til spillist bara í svíana ;) Upprunalega uppskriftin er annars hér.

Tekur ekki nema 20 mínútur að skella þessu saman og báðir drengirnir mínir báðu um viðbót... það er alveg andvirði Michelinstjörnu á mínu heimili.

Lax í saffransósu

1-2 rauðar papríkur skornar í stærri bita

1 laukur skorin í báta

smá olía að steikja uppúr

1 umslag saffran (0,5 gr)

cirka 600 grömm lax, skorin í stóra teninga (garanterar stuttan eldunartíma)

salt og pipar

2 dl rjómi (ég notaði hafrarjóma)

1 tsk edik (ättika, 12%)

Byrjar á að steikja á pönnu papríku og lauk uppúr smá olíu, dreifir yfir saffraninu og steikir nokkrar mínútur í viðbót. Bætir við rjóma og ediki og setur laxinn ofaní. Sjóða í 5 mínútur og taka svo af hellunni, setja lokið á og leyfa að standa 5 mín í viðbót.

Bar þetta fram með soðnum kartöflum fyrir hina en sjálf borðaði ég þetta með soðnum aspas (=GI/LCHF).

Hafrakex

2011-11-26T23:08:00.000-08:00

Jólabaksturinn hafinn enda er fyrsti í aðventu núna um helgina. Geymi það örlítið að baka haframjölsrúsínusmákökurnar en langaði að prófa að gera hafrakex. Hef aldrei gert kex enda er maður alltaf svo sólgin í smákökur að það er lítill tími afgangs fyrir "hollustuna". Það er minni sykur í kexi, það er stökkara og nýtist miklu betur en kökukynið því það er hægt að smyrja það með sultum, ostum osfrv. Ég fékk aðstoð við baksturinn hjá Hilmi sem gat bæði stungið út úr deiginu og svo "gafflað" hverja kexköku áður en platan fór í ofninn.

Hafrakex

(uppskrift úr "Adventsbak" eftir Linneu Seidel)

150 g smjör

2,5 dl mjólk

6 dl hafragrjón/mjöl (þetta sem fer í hafragrautinn!)

2 dl grahamsmjöl

1 tsk bakpulver (örlítið minna af lyftidufti)

0,5 tsk salt

2 msk sykur

Bræða smjörið í potti og bæta við mjólk, hita þartil næstum fer að sjóða og hella svo yfir haframjölið sem búið er að mæla í skál. Hrært og látið standa þartil kólnar. Verður eins og þykkur grautur.

Blanda saman restinni og bæta við. Hnoða þartil orðið að fallegu deigi. Flatt út og stungið út í þeirri stærð/lögun sem maður óskar eftir. Við notuðum frekar lítið mót því mér finnst gaman að geta boðið uppá munnsbitastærð. Röðuðum á plötu og stungum svo með gaffli 3x í hverja köku.

Bakað í 8 mín við 200 gráðu hita.

Rifsberjakaramellukaka

2011-07-31T13:36:00.000-07:00

Lærði mjög mikilvæga lexíu í dag: rjómi úr þrýstihylkjabrúsa heldur ekki formi meira en 5 mín. Rétt náði að smella af áður en fór að leka niðureftir annari hliðinni... en gott var þetta nú engu síður ! Eiginlega lýgilega gott. Súr og frískleg rifsber með karamellu og rjóma á möndlumassabotni. Mmmm...

Rifsberjakaramellukaka

300 g möndlumassi, rifinn gróft á rifjárni

1 heilt egg

2 eggjahvítur

Öllu blandað vel saman þartil möndlumassinn er alveg blandaður saman við eggin. Sett í kökuform sem búið er að klæða að innan með bökunarpappír og bakað við 175 gráðu hita í 20-25 mín. Jafnvel lengur, ég bætti við nokkrum mínútum þartil botninn var farin að taka smá lit. Kælt.

Karamellukremið er: 1,5 dl þeytirjómi hitað í potti ásamt 0,5 dl sykur og 0,5 dl síróp (ljóst). Leyft að malla við meðalhita í 15 mín eða þartil farið að þykkna aðeins. Hrært af og til en fylgjast vel og vandlega með að ekki brenni. Leyft að kólna aðeins (og stífna enn meir) og síðan hellt yfir kaldan botninn.

Þeytirjómi stífþeyttur og sprautað á botninn (sjá mynd) og rifsberjaklösum raðað inní.

Samkvæmt beiðni: Guinnes (bjór) gúllas

2011-01-29T03:15:00.001-08:00

Sönn ánægja að fá að skrásetja og birta eina af uppáhalds gúllas uppskriftunum mínum. Hægeldað kjöt er nú gott hverju sem það er eldað uppúr en að sjóða uppúr bjór (Guinnes helst) er tær snilld. Þessi uppskrift kemur frá BBC Good Food (http://www.bbcgoodfood.com/).

Bjór (Guinnes) gúllas

2 msk olía
1 kg gúllaskjöt (högrev í bitum eða annað nautakjöt)
1 laukur, skorin í stærri bita
10 gulrætur, afhýddar og skornar í stærri bita
2 msk hveiti
500 ml af Guinnes-bjór
1 kubbur af nautakrafti
örlítill sykur
3 lárviðarlauf
timjan, 1 tsk ef þurrkrydd en ef ferskt 1-2 stilkar

Ofninn hitaður að 160 gráðum. Olían hituð í potti og kjötið brúnað í heitri olíunni. Passa sig að setja ekki allt kjötið í einu ef maður er með marga bita og frekar lítinn pott því maður vill ná girnilegum steiktum bitum og ekki soðnum bitum eins og gerist ef það er þröngt í pottinum.
Kjötbitarnir teknir uppúr og lagðir til hliðar. Bæta við gulrótarbitum og lauk oní pottinn og leyfið að steikjast smástund. Dreifið yfir hveitinu og veltið aðeins grænmetinu í því. Hellið svo yfir bjórnum og myljið nautakraftsteninginn útí. Kryddið með salti, pipar, sykurklípu, lárviðarlaufunum og timjan. Látið suðuna koma upp og setjið svo lokið á pottinn og setjið inn í ofn (ef potturinn þolir ekki að fara í ofn þarf þá að hella gúllasinu yfir í einhvað annað ofnhelt form og setja lok eða álpappír yfir). Elda í 2,5 klst.

Þetta gúllas er engu síðra daginn eftir að það hefur verið eldað.
Ber fram með kartöflumús eða brauði.

GI - grænmetis"spagettí" með reyktum lax

2011-01-20T01:16:00.000-08:00

Byrja á að biðjast afsökunar á mis-girninlegri mynd af réttinum. Ég var nefnilega byrjuð að borða (gúffa í mig) þegar ég áttaði mig allskyndilega á hversu hrikalega gott þetta væri og að ég bara YRÐI að blogga þessari uppskrift áfram með tilheyrandi mynd.
Svo úr varð.

Þetta er snilld. Þetta er kolvetnaminnsti pastaréttur í heimi. Pastað er nefnilega ekki pasta.. heldur strimlað zucchini. Jápp ! Hrátt og alles ! Og Ingó var búin að gleypa í sig hálfum réttinum áður en hann áttaði sig á því að "pastað" væri alls ekki pasta. Snilld.

Zucchinispagettí með reyktum lax

1 rauðlaukur, saxaður
1-2 msk smjör
2 dl rjómi (ef þú villt nota venjulegan er það í lagi, annars einhverskonar matreiðslurjóma.. ég nota hafrarjóma)
safinn úr 1/2 sítrónu
frystar grænar baunir, 1-2 dl eða meir eftir smekk, afþíddar eða snöggsoðnar
1 msk hakkað dill (ég sleppti því sársaukalaust)
150 g sykurbaunir (sockerärtor, þessar flötu), snöggsoðnar og skornar í þykka strimla
300-400 g reyktur lax, skorin í bita
1 grænt zucchini

Byrjar á að strimla zucchinin; tekur skrælara og skrælar fyrst græna hýðið utanaf og svo bara heldur maður áfram. Færð ofurmjóar og fínar ræmur útúr þessu sem líta út einsog tagliatellepasta. Skiptir ræmunum á milli tveggja diska.
Steikir laukinn uppúr smjörinu smástund og bætir svo við rjóma og sítrónusafa. Leyfir aðeins að sjóða saman. Bætir svo við grænu baununum og laxinum. Leyfir öllu að hitna saman. Dreifir svo laxasósunni yfir zucchiniræmurnar á diskunum og dreifir strimluðu sykurbaununum yfir. Smá pipar og örlítið af smátt rifnum sítrónuberki dreift yfir í lokin svona uppá lookið að gera ;)

p.s. það glittir í gulrótarbita á myndinni. Átti nefnilega bara frosnar baunir MEÐ gulrótarbitum í pokanum svo ég notaði það og það kom alls ekki að sök. Bara smá auka grænmeti ! :D

Þorskur með sítrónulinsum

2011-01-07T10:38:00.000-08:00

Þessi uppskrift æpti á mig "prófaðu mig!" þegar ég las Dagens Nyheter í morgun. Og auðvitað hlýddi ég því ;) Og skráset hingað samviskusamlega (upprunalega uppskriftin á sænsku hér);

Þorskur með sítrónulinsum

Þorskur"hryggur"; magn eftir fjölda gesta. Eflaust hægt að nota venjuleg þorskflök líka en hryggurinn er þægilega jafn-stór. Keypti frystan og hann var mjög góður.

Þíðir bitana, ofninn á 150 gráður, saltar fiskinn og eldar í 15-20 mín. Kryddaðir eftirá með 1 tsk (gjarnan sterku) papríkudufti og pipar. Sáldra smá olíu yfir.

2 dl belúga linsur. Svartar og óhemju góðar. Soðnar í vatni (þrefalt meira magn en ef linsunum) með 2 teningum af grænmetiskrafti í 15 mín. Ekki fullsjóða því þær eru svo steiktar eftirá og eiga ekki að fara í mauk.

1 sítróna þvegin vandlega og skorin í sneiðar. Steiktar í potti ásamt soðnu linsunum og 1 msk af olíu.

Svo er gerð papríkusósa með;

1,5 dl grilluð papríka í krukku. Ef þú býrð ekki í Svíþjóð og getur nálgast niðursoðnar grillaðar papríkur þá má nota ferskar papríkur (rauðar), skornar í helminga og kjarninn tekinn úr, grillaðar með hýðið uppávið í ofni á 250 gráðu hita í 20 mín eða þartil farnar að verða svartar að ofan. Teknar út og settar í plastpoka sem er lokaður vandlega. Eftir smástund er hægt að draga hýðið af.

Papríkan er maukuð með töfrasprota ásamt safanum úr hálfri sítrónu, 1,5 dl sýrðum rjóma og smávegis af salti.

Mexíkönsk svartbaunasúpa

2010-10-12T13:36:00.000-07:00

Hef í kvöld fundið uppáhalds súpuna mína. Við sleiktum pottinn og fórum strax að skipuleggja hvenær við gætum haft þessa súpu aftur í matinn. Algjört möst-try, holl og góð, sneisafull af bæði bragði og bætiefnum ;)

Mexíkönsk svartbaunasúpa
fyrir 4 (úr LagaLätt, sept 2010)

1 pakki beikon (cirka 200 grömm), skorið í bita
1 msk smjör
2 laukar, saxaðir
2 sellerístilkar, sneiddir fínt
3 gulrætur, skornar í fernt á lengdina og svo í þvert í litla bita
1/2 - 1 rautt chillí, fræin hreinsuð út og svo saxað
1 tsk cummin
3 dósir svartar baunir (eða samsvarandi magn af þurrum, lagðar í bleyti)
5 dl vatn
2 msk kjúklinga eða grænmetiskraftur
1,5 tsk hvítvínsedik
1 tsk púðursykur/dökkur muscavado... eða bara venjulegur sykur ef hitt er ekki til í skápnum hjá þér

Og til að setja ofaná hvern súpudisk þegar borið er fram;
- ferskir tómatar, skornir í litla bita
- ferskur kóríander, mikið af því... er svo gott
- niðursneiddur salatlaukur eða vorlaukur (má sleppa)

Best að byrja á að saxa grænmetið (laukinn, chillí, sellerí).

Svo steikir maður beikonbitana í djúpum súpupotti (ekki á pönnu). Bæti útí smá smjörklípu og leyfir að bráðna og helli öllu saxaða grænmetinu útí ásamt cummin. Leyfi að steikjast í nokkrar mínútur. Opnar baunadósirnar og skola baunirnar uppúr köldu vatni. Set í skál og mixa GRÓFT með töfrasprotanum (eða cirka 1/3 af heildarmagninu í matvinnsluvél) Bæti svo við vatninu og kraftinu.

Leyfi að sjóða í 10 mínútur þartil súpan er orðin þykk og fín. Smökkuð til með hvítvínsediki, sykri, salti og pipar.
Borin fram í skálum og ofanáleggið sett á hvern disk ... eða hverjum og einum leyft að raða ofaná það sem þeim finnst best.

Með þessu gerði ég ostatortillur; rifinn ostur (1 poki), 1-2 dl gulur maís úr dós og smávegis ferskur kóríander. Öllu blandað saman og væn handfylli sett ofaná eina tortillu. Önnur tortilla sett ofaná og þrýst vel saman svo úr verði samloka. Penslað með smá olíu og steikt á pönnu þartil ein hliðin hefur tekið lit. Snúið og steikt á hinni hliðinni. Skorið í fernt og borið fram með súpunni.

Fiskur með appelsínutómatsósu

2010-08-23T13:34:00.000-07:00

Einhvernvegin finnst mér ekki fiskur og appelsína passa saman... fyrr en ég smakkaði það ! Ótrúlega ferskt og skemmtileg tilbreyting á "fiskur með tómatsósu" sem öll börn lifa á. Hilmi fannst þetta meira að segja gott og át upp til agna (með smá alvöru tómatsósu líka). Sem meðlæti var ofnbakað butternut squash (svona aflangt grasker) með dilli. Smaskens ;)

Fiskur með appelsínutómatsósu
(úr LagaLätt, sept '10)

Þorskbitar, notaði frosna sem ég afþíddi og raðaði í ofnfast mót, salta og pipra

4 skalottlaukar, skornir á einn veginn svo myndi hringi
2 appelsínur, afhýddar og filéaðar (skera út bátana án himnunnar), bitanir svo helmingaðir
2 msk nýrifinn engifer
1-2 hvítlauksrif, kramin
1 dós saxaðir tómatar

Hita olíu í potti og steikja skalottlaukinn smástund. Bæta við engifer og hvítlauk og láta malla smástund. Hella svo tómatadósinni útí. Raða appelsínubitunum ofaná fiskinn og hella úr pottinum yfir. Ofnbaka í 15 mín við 225 gráður.

Áður en maður leggur í að gera fiskinn getur maður nýtt tímann með því að afhýða graskerið og skera niður í mjóa báta. Hella smá olíu yfir, salta og pipra og skella inní ofn. Það verður mjúkt á cirka 20 mín. Mixa með töfrasprota, bæta við dilli (2 msk saxað) og 1-2 dl sýrðum rjóma eða þykkri jógúrt.

Sítrónukjúklingur með marokóskum gulrótum

2010-07-06T10:57:00.000-07:00

Þessa uppskrift reif ég samviskusamlega úr DN í gærmorgun og prófaði svo í kvöld. Dýrðlegt ! Reyndar fannst mér sjálf uppskriftin frekar flókin í framkvæmd svo ég ákvað strax að staðfæra með betri útskýringum.. og það að sjálfsögðu á íslensku ;)

Sítrónukjúklingur með marokóskum gulrótum

Kjúklingabringur (2 hér, gætu verið fleiri) látnar marínerast í kryddlegi yfir nótt eða lágmark 10 mínútur.

Kryddlögur;

1 sítróna, byrja á að fínrifa börkinn utanaf henni og geyma, safinn kreistur úr og settur í skál

3 msk olía

1 msk sambal oelek

1 msk hunang

1 msk sojasósa

Gulrótarsalat;

4-6 gulrætur (fer eftir fjölda þess sem borða) skornar í cirka 1 cm stóra bita, gjarnan örlítið á ská

Steiktar á meðalheitri pönnu uppúr 2 msk olíu, þegar fer að taka smá lit eða mýkjast bæta útá kryddum;

1 tsk kummin

1-2 msk fersk rifin engifer

smá salt

1 rautt chillí, fínsaxað (sleppti þessu því sonurinn átti að borða líka)

1 msk fljótandi hunang, drussað yfir að lokum. Pönnulokið sett á og hitinn lækkaður niður í algjört lágmark eða jafnvel slökkt og gulræturnar látnar mýkjast... cirka 10 mín.

Svo eru gulræturnar lagðar uppá fat (eða á disk hvers og eins) og eftirfarandi sáldrað yfir;

geitarost (cirka 100 gr samtals)

ristuð sólkjarnafræ eða graskersfræ (lúkufylli)

þurrkuð trönuber (1/2 dl samtals)

Kóríanderdressing;

1 krukka ferskur kóríander (lúkufylli)

safinn af 1/2 lime

2 msk olía

salt

Allt mixað saman með töfrasprota.

Nú er kjúllinn tekinn úr maríneringunni og steiktur á pönnu þartil tekur lit. Hitaður í ofni (200 gráðu heitum) í 20 mín eða meir þartil fulleldaður. Tekin út og rifna sítrónuberkinum sáldrað yfir ásamt örlitlu þurrkuðu oregano.

Kóreanderdressingin er borin fram með og sáldrað yfir kjúklinginn og gulræturnar þegar allt er komið á disk.

Rauðbeðusúpa að mínum hætti

2010-05-24T23:47:00.001-07:00

Í gær hafði ég einsett mér að búa til rauðbeðusúpu og fór þess vegna í uppskriftaleit. Skoðaði bæði bækurnar mínar (nokkrir hillumetrar fullir af viðeigandi bókum) og á netinu. Lokaniðurstaðan var sú að ég átti ekki allt sem uppskriftarhöfundar vildu meina að ætti að vera í rauðbeðusúpu þannig að ég varð að taka málið í eigin hendur og semja einhvað á staðnum.
Auðvitað varð þetta einhver sú besta rauðbeðusúpa sem ég hef eldað og borðað ;) ! Finnst það líka mark um góða súpu ef 5 ára sonurinn sleikir skálina sína....

Rauðbeðusúpa

4-5 ferskar rauðbeður skrældar og skornar í bita (því minni bitar, þeim mun minni suðutími)
3 gulrætur skrældar og skornar í bita

2 skalottlaukar
1 feitt hvítlauksrif

Sneiddi báða laukana þunnt og léttsteikti uppúr vænni smörklípu þartil urðu glærir. Setti svo rauðbeðu og gulrótarbitana útí og vellti uppúr smjöraða lauknum. Hellti svo soðnu vatni yfir allt þartil rétt þakti grænmetisbitana og svo cirka matskeið af lantbuljong (ferlega góður grænmetiskraftur). Leyfði þessu öllu að sjóða í 30-40 mínútur eða þartil mér fannst rauðbeðurnar orðnar mjúkar. Stakk svo töfrasprotanum oní og blitzaði allt þartil orðið að mauki. Maukið var frekar þykkt svo ég þynnti með meira soðnu vatni. Setti 2 tsk af rauðvínsedik útí og saltaði svo.
Þetta bar ég fram með timjankvistum í diskunum og fetaostahræru (hálft stykki stappaður fetaostur + 1 dl sýrður rjómi).

Fitulaus, sykurlaus "súkkulaðiís"

2010-04-27T11:44:00.000-07:00

Þessa uppskrift sá ég í einhverju konublaði þarsem verið var að kynna enn einn megrunarkúrinn. En einhvað heillaði mig og ég barasta varð að prófa. Og alveg get ég lifað á þessu sem sjónvarpsnammi í staðinn fyrir alvöru rjómaís ! ... allavega svona af og til ;)

2 - 3 bananar, skornir í sneiðar og frystir
kakó í frjálsu magni
örlítil sletta af tyrkneskri jógúrt, ab-mjólk eða skyri

Mixar öllu saman með töfrasprota eða í matvinnsluvél. Maður þarf að prófa sig áfram með magni af kakói.. fer eftir því hversu dökkan ís óskað er eftir. Borða eins og skot !

Áhugaverðir hlekkir

2010-04-11T01:44:00.000-07:00

Er komin í einhvað furðulegt matarskap sem hefur áhrif á mig á þann veginn að núna er ég orðin súrdeigsforeldri (lagði í súrdeig sem fékk að standa í 4 daga og ætla að gera fyrsta brauðið úr í kvöld... svo set ég afgangin af súrdeigsgrunninum í glerkrús í ísskápinn og "mata" einusinni í viku) ! Þannig að baksturs, brauð og kökuuppskriftir eiga hug minn og hjarta allt þessa dagana. Hef rekist á svo mörg skemmtileg blogg sem fjalla um þetta og annað sem kveikir líf í sálu mér og bestust eru eftirfarandi;

http://miaohrn.wordpress.com

og svo beint á uppskriftirnar hennar; http://miaohrn.wordpress.com/recept/

http://www.paindemartin.blogspot.com/

http://mollyshalsoblogg.blogspot.com/

http://nasselblomchoklad.blogspot.com/

SúkkulaðikakAN

2010-04-10T11:56:00.000-07:00

Þessa súkkulaðikökuuppskrift á ég eftir að gera aftur.. og aftur... alveg ferlega góð og pottþétt hægt að nota öðruvísi frosna eða ferska ávexti á milli, öðruvísi krem ofaná.. jah... nánast hvað sem er. Passlega þétt, passlega einföld og passlega óholl því það er ekkert smjör í henni og fullt af bönunum !

Súkkulaðikökubotn

(úr LagaLätt, apríl 2010)

4 meðalstórir bananar (300 g án hýðis)
3 egg
2,5 dl sykur
1,5 dl rapsolía (eða hvaða bragðlitla olía sem er.. einsog t.d. Isio!)
100 g dökkt 70% súkkulaði
2,5 dl hveiti
0,5 dl kakó
2 tsk vanillusykur
1,5 tsk bakpulver (eða aðeins minna af lyftidufti)
ponsuklípa af salti

Hita ofninn á 175 gráður. Stappa bananana vandlega, t.d. með kartöflustappara og þeyta saman með sykrinum og eggjunum. Hita olíuna varlega í potti og skella súkkulaðinu útí og leyfa því að bráðna saman við olíuna. Passa að það hitni ekki of mikið ! Ég tók pottinn af hellunni um leið og ég bætti súkkulaðinu við.
Blanda öllum þurrefnunum saman í skál. Hella súkkulaðiolíunni ofan í hrærivélaskálina hjá bananaeggjablöndunni. Setja svo þurrefnin saman við og hræra (venda!) varlega með sleif. Smyrja hringlaga form og hella deiginu útí. Baka í miðjum ofni cirka 35 min. Leyfa að kólna og skera botninn í tvennt svo úr verði pláss fyrir kremið í miðjunni ;)

Krem í miðjuna;
250 g rjómaostur (Philadelfia)
fínrifinn börkur af hálfri sítrónu
100 g frosin ber (ég notaði hallon)
1 dl flórsykur
Allt blandað saman í hrærivél.

Ég setti svo kakósmjörkrem ofaná en í upprunalegu uppskriftinni var marsípan"þak" sem ég væri til í að prófa næst.

Bökuð ostakaka

2010-03-25T08:57:00.000-07:00

Grunnuppskriftir eru svo mikil snilld. Endalaust hægt að varíera útkomunni. Fer þá bara eftir því hvaða þurrkaða ávexti maður á til í skápunum hjá sér.
Bjó þessa til um helgina og við fjögur fullorðin náðum að slátra heillri sem eftirrétt þrátt fyrir að hafa étið á okkur hálfgert gat af aðalréttinum. Svo mikil var græðgin og það góð var hún. Ég kynni til sögunnar;

Bökuð ostakaka - grunnuppskrift

50 g smjör
150 g digestive kex

Smjörið brætt og kexið mulið í agnir. Smjörinu hellt útá mylsnurnar og blandað vel saman. Sett í botninn á smjörpappírsklæddu smelluformi og þrýst vel út.

350 g rjómaostur (Philadelphia), hrært þartil mjúkt
150 g sykur
4 egg
1 sítróna, bæði safinn innanúr og fínrifinn börkurinn utanaf
2 tsk vanilludropar
handfylli af þurrkuðum ávöxtum/berjum að eigin vali. Ég notaði í þessu tilfelli trönuber.

3 dl sýrður rjómi (ég notaði 34% feitan)

Öllu nema sýrða rjómanum og þurrkuðu ávöxtunum hellt í skál og blandað vel saman. Hellt ofaná kexbotninn, þetta þurrkaða að eigin vali dreift ofaná, og bakað í 180 gráðu heitum ofni í 30 mín. Taka út og leyfa að standa í 10 mín (heldur áfram að bakast þó það sé tekið út). Sýrði rjóminn svo smurður ofaná og skellt aftur inní ofn í 10 mín í viðbót. Látið kólna vel og geymt í ísskáp þartil bera á fram.

Súpa úr hvítum baunum... löguð á korteri !

2010-01-31T10:05:00.000-08:00

Við sem erum einhvað örlítið GI meðvituð forðumst kartöflur einsog heitan eldinn... en ég er sko búin að finna það næst besta; stórar hvítar baunir !
Heitar eða kaldar eru þær alveg einsog kartöflur á bragðið. Og núna þegar ég hef prófað að gera súpu úr þeim er ég alveg sannfærð um bragðvíxlunina. Fín "skápasúpa" í þokkabót (ef mar á tvær dósir af stórum hvítum baunum eða í öðru falli Cannellinibaunir í skápnum og spínat í frystinum er dæmið klárt).

Súpa úr hvítum baunum

1 laukur, saxaður
1 hvítlauksrif, pressað/kramið
2 dósir af stórum hvítum baunum eða Cannellini baunum þær fyrrnefndu finnast ekki, vökvanum hellt af og baunirnar skolaðar.
1 l grænmetis eða kjúklingasoð
2 msk sítrónusafi
rifinn sítrónubörkur af 1/2 sítrónu
1 dl sýrður rjómi
spínat í frjálsu magni (ferskt eða frosið og afþítt; vatnið kreist vel úr)
salt og pipar

Laukarnir mýktir í smá olíu, baunum og soði bætt við. Leyft að malla í 10 mín og svo mixað slétt með töfrasprota eða í matvinnsluvél. Sítrónusafa og berki bætt við ásamt sýrða rjómanum. Spínatinu bætt við og leyft að hitna í gegn. Smakkað til með salti og pipar.

GI-bananabrauð... ofurhollt !

2010-01-28T08:03:00.000-08:00

Það er ekki beint auðvelt að baka GI-heldar uppskriftir og þess vegna varð ég dálítið vel forvitin að komast að því hvernig þessi yrði á bragðið. Þurfti aðeins að breyta frá upprunalegu uppskriftinni (amerískar vörur sem ég hef ekki aðgang að) en mér fannst útkoman alveg fantagóð. Vel samkeppnishæft við þær útgáfur sem ég er vön að baka og stútfull af "góðum" sykri, eggjahvítu, grófmöluðu spelti, hörfræjum og þar fram eftir götunum.

Hollt (GI) bananabrauð

1,5 bolli (355 ml) heilhveitispelt eða heilhveiti venjulegt
3/4 bolli (177ml) hörfræ sem eru keyrð í matvinnsluvél þartil orðin að grófu dufti
2 tsk lyftiduft/bakpulver
1 tsk matarsódi/natrón
1 tsk kanil
1/2 tsk salt
3 vel þroskaðir bananar
6 msk sykur að eigin vali. Ég notaði ávaxtasykur (fruktos) í sama magni þar sem hann er GI vænni en sá hvíti/brúni.
3/4 bolli (177 ml) gräddfil/buttermilk/þykk venjuleg jógúrt með smá sítrónusafa útí
4 eggjahvítur
1 tsk vanilludropar
3/4 bolli (177ml) saxaðar valhnetur.

Byrjaði á því að þeyta eggjahvíturnar ásamt sykrinum þartil þær voru farnar að freyða vel. Ekki stífþeyta þó, bara farnar rétt að lyfta sér. Bætti svo öllum þurrefnunum saman og þeytti örstutta stund saman við hvíturnar.
Stappaði bananana og bætti við þá gräddfilnum og vanilludropunum. Hrærði þetta varlega saman við hvíturnar+hveitið og allra síðast söxuðu valhneturnar.
Hellti í aflangt form og bakaði við 175 gráður í 40-50 mín.

Jógúrtbrauð

2010-01-27T01:02:00.001-08:00

Fer að verða síðasti sjéns að nýta hefunarábyrgðina sem þungað ástand mitt hefur og baka alvöru gerbrauð... prófaði þetta í gær og leyfði Hilmi að "skreyta" brauðið með hendinni sinni. Kom vel út bæði á að líta og borða. Verst að ég tók ekki mynd... en ef ég lýsi verklaginu þá bað ég Hilmi að setja hendina sína ofaná brauðið áður en ég setti það inní ofn, svona einsog ég ætlaði að teikna eftir hendinni. Svo var ég með hveiti í tesíl og dustaði VEL yfir brauðið svo það varð allt hvítt fyrir utan handarfarið sem myndaðist þegar hann tók hendina í burtu. Eftir að brauðið hafði bakast og orðið gullinbrúnt lýsti fjarvera hvíta hveitisins upp hendina sem hafði stækkað í ofninum og aflagast pínu svo úr varð rosa spennandi listaverk (eða það fannst allavega Hilmi sem stolltur borðaði handabrauðið "sitt").
Það er líka hægt að búa til stensil úr einhverju mynstri og dusta yfir hveiti.. nú eða bara dusta smá hveiti yfir án nokkurs og sjá æðarnar sem myndast þegar brauðið lyftir sér.

Uppskriftin er allavega einföld og laus við sykur af nokkurri sort sem er ekki verra ;)

Jógúrtbrauð
2 litlir hleifar

5 dl jógúrt/ab mjólk. Velgd uppað 37 gráðu hita (fingurvolgt).
50 g lifandi ger (eða þurrger), blandað saman við hluta af volgu jógúrtinni. Þarf ekki mikið til að fá það til að leysast upp, cirka 1-2 dl.

Í hrærivélaskálina er svo sett;
6 dl rågsikt/rúgmjöl
3-4 dl hveiti, geyma rúman dl til að hnoða út deigið með eftir að það hefur hefast í fyrsta sinnið.
2 tsk salt

Allt unnið vel saman í vélinni, plastfilma + viskustykki sett yfir skálina og hún sett til hliðar gjarnan á hlýlegan stað í eldhúsinu. Látið hefast í minnst 30 mín (ég leyfði að hefast í rúman 1,5 klst því ég var ekkert að flýta mér aldrei þessu vant).

Svo tekið úr skálinni og hnoðað örlítið með afgangs hveitinu. Það þarf ekkert að hnoða þartil það hættir að vera klístrað.. bara rétt svo maður geti búið til tvo litla hringlótta hleifa sem settur eru á bökunarpappírsklædda grind. Leyft að hefast í 30 mín til viðbótar. Skreytt með hveitimynstri ef maður vill.
Bakað í 15 mín við 250 gráður og leyft að hvílast í eftirhitanum þegar maður hefur slökkt að bökunartímanum loknum. Við vorum svo gráðug að við borðuðum brauðið ylvolgt 20 mín eftir að það hafði fullbakast, mjög gott. Þegar það svo hafði alveg kólnað seinna um kvöldið var það orðið þéttara í sér og "þroskaðra" einhvernvegin. Alveg jafn prýðisgott daginn eftir og skorpan orðin mýkri af dvölinni í plastpokanum.

Fljótgerður pizzabotn úr spelti !

2010-01-14T12:25:00.000-08:00

Alveg hreint elska ég brauðuppskriftir sem innihalda lyftiduft í staðinn fyrir ger. Hef oftast ekki þolinmæðina í að láta brauð lyfta sér og þá sérstaklega ekki ef maður er að gera heimagerða pizzu í snarhastri. Annars verður freistingin að labba útá horn og sækja sér eina tilbúna hjá vingjarnlegu kúrdunum of mikil.

Í kvöld prófaði ég eftirfarandi uppskrift með hreint æðislegum árangri. Nýtt uppáhald hjá fjölskyldunni !

5 dl spelt (dinkel á sænsku), notaði til helminga fínmalað og grófmalað
1 tsk salt
2 msk olía
3 tsk lyftiduft
1 msk blandað þurrkrydd (setti smá oregano, timjan, basiliku, jurtaaromat ofl)
3 dl ab-mjólk (naturell fil/a-fil)

Öllu hrært saman þar til rétt svo blandað saman. Má ekki ofhræra. Verður einsog teppalím í áferðinni en það er í fínu lagi, ég lofa ! Svo klessir maður þessu á bökunarpappír í þeirri stærð sem maður vill ná (ég gerði eina litla fyrir Hilmi og eina stóra fyrir okkur fullorðnu). Botninn á eftir að tvöfaldast að þykkt inní ofninum þannig að það má dreifa svolítið vel úr deiginu.
Forbakað í 200 gráðu heitum ofni í 5 mín, tekin úr og sett pizzasósa og álegg að eigin vali, bakað áfram í 15 mín í viðbót.

Rækjuréttur með harissa

2009-12-19T09:49:00.000-08:00

Stundum er bara svo yndislega gott að geta eldað einhvað sem þarf ekki að kaupa neitt í... allt til í skápum, ísskáp og frysti !

Harissa er norðurafrískt chillíkrydd og til bæði þurrt í duftformi og sem mauk í krukku svipað og tælenskt rautt/grænt currypaste. Óhemju góð kryddblanda sem er feykigóð bæði svona útí tómatmaukspottrétt og svo sem köld sósa útí þykkri jógúrt ef maður vill fá smá "stíng" í eftirbragði.

Mér finnst vel þess virði að eiga til stórar rækjur, þessar sem eru með halanum á og maður þarf að pilla af áður en eru eldaðar. Þessar litlu verða svo óhemju litlar þegar þær hitna í gegn.. fínar í rækjusalat og svoleiðis en ekki kannski í matseld þegar þær eiga að vera í aðahlutverki ;)

Rækjuréttur með harissa

(frá Good Food, upprunalega uppskriftin er hér)

1 laukur, fínt sneiddur (ekki saxaður!)

2 hvítlauksrif, kramin

smá olía

1 tsk cummin (spiskummin)

1 tómatar í dós

2 tsk harissa

tvær til þrjár góðar handfyllir af risarækjum

handfylli af ferskum kóríander, saxað

Byrja á að hita laukana í olíunni þartil rétt farnir að vera mjúkir, bæta við cummin og velta þeim uppúr kryddinu á pönnunni cirka 1 mín. Hella svo úr tómatadósinni á pönnuna og bæta við harissakryddinu. Leyfa að malla nokkrar mínútur þartil farið að þykkna aðeins. Bæta svo við rækjunum og þartil heitar í gegn.. 3 mín eða svo. Bæta síðast við kóríandernum.

Borið fram með soðnu couscous eða bulgur (gott að bæta smá kjúklinga eða grænmetiskrafti við vatnið þegar það er soðið) og p.s. bulgurinn verður extra góður ef maður bræðir smá smjör í pottinum og veltir ósoðna bulgurnum uppúr því áður en vatninu + kraftinum er bætt við til að sjóða.

Tom Ka Gai kjúllapottréttur

2009-12-03T09:45:00.000-08:00

Tom Ka Gai er alþekkt thailenskt matarfyrirbæri og kemur oftast í súpuformi. Í LagaLätt gera þeir pottrétt úr því ásamt kjúkling, sveppum, sítrónugrasi, chillí, sykurbaunum og dýýýrindis kóríanderdressingu. Dressingin hljómar kannski dálítið furðulega með léttmæjónesi og lime í stórum stíl í en hún kom hressilega á óvart og átti svo innilega vel við pottréttinn.

Tom Ka Gai - kjúllapottréttur
(úr LagaLätt, sept 09)

600 g kjúklingakjöt (skiptir engu hvort það eru bringur eða læri) skorið í munnbitsstóra bita

1 sítrónugras, örfínsaxað
1 rautt chillí, fræhreinsað og fínsaxað
100 g sveppir, skornir í helminga
2 dl kókosmjólk
1,5 dl vatn + grænmetiskraftur
1 púrrlaukur, skorin í frekar stóra bita
150 g sykurbaunir (sockerärtor) helmingaðir

Kjúklingurinn steiktur á pönnu uppúr smá olíu. Sítrónugrasi, chillí og sveppum bætt við og leyft að steikjast aðeins með kjúllanum. Saltað og piprað. Bætið svo við kókosmjólkinni, vatni og krafti og leyfið að malla undir loki í 10 mín.
Púrrlauk og sykurbaunum er svo bætt við og leyft að malla áfram í 3-5 mín.

Borið fram með hrísgrjónum og kóríanderdressingunni.

Kóríanderdressing
1 krukka ferskur kóríander (eða 2-3 tsk af söxuðum kóríander úr dós)
1/2 dl léttmæjónes (ég var gráðug og notaði 1 dl)
1 lime, fínrifinn börkurinn utanaf og safinn innanúr (uppskriftin segir börkurinn af 2 lime og 1 msk safi en mér fannst þetta fullkomið með safa og berki úr 1)
salt og pipar.
Allt mixað með töfrasprota.

Te-kaka með döðlum

2009-11-26T22:46:00.000-08:00

Ekki laust við að ég sé að fara yfirum í bakstursáhuga þessa dagana. Bara svo margt sem mig langar að prófa ! Sérstaklega núna á jólamánuði þegar bakstursilmurinn sér um að skapa frið og ró á heimilinu (og þá þarf maður ekki að taka til !).

Ég átti því miður ekki "rétta" te-ið sem talið var upp í uppskriftinni en notaði í staðinn Indian Chai te. Held það sé engu verra.

Tekaka með döðlum
(úr LagaLätt des, 2007)

1 appelsína
1 sítróna
150 g döðlur sem búið er að taka kjarnann úr
1 dl sterkt Lapsang souchong te eða Earl grey
150 g smjör
1,5 dl hrásykur
2 egg
3 dl hveiti
1 tsk bakpulver/lyftiduft

Ofninn hitaður að 175 gráðum og aflangt bökunarform klætt með bökunarpappír.
Skola vel og skrúbba af ávöxtunum og börkurinn fínrifinn af.
Hita tebolla, vel sterkan (pokinn hafður ofaní nokkrar aukamínútur) og hella 1 dl af bollanum yfir döðlurnar í skál. Leyft að kólna aðeins.

Smjörinu og sykrinum blandað vel saman. Eggjunum bætt við einu og einu í senn. Döðluteblöndunni bætt útí ásamt berkinum af ávöxtunum. Bæta svo við hveiti og bakpulver/lyftidufti og blanda varlega saman þartil orðið að jöfnu deigi.

Hellt í bökunarformið og bakað neðarlega í ofninum í 45-50 mín.

Semifreddo - næstum því ís

2009-11-23T01:08:00.000-08:00

Grunnurinn að þessum semifreddo (þýðir víst hálf-frosið á ítölsku og er einsog heimagerður ís) er einfaldlega létt og gott vanillubragð. Svo getur maður bætt við hverju sem er áður en borið er fram; ávöxtum/berjum, hnetum, súkkulaði eða öðru sælgæti. Já hverju sem hugurinn girnist !

Ég hef gert þetta tvisvar. Fyrsta skiptið dreifði ég ofaná ristuðum pistasíuhnetum og dökku súkkulaði. Í gær vorum við í aðeins meira vetrar-jólaskapi svo fyrir valinu varð Marabou-súkkulaðið "vinter" og smá skær rauður granateplasafi.

Semifreddo - grunnur

2,5 dl mellangrädde (26% feitur rjómi)
1 msk vanillusykur

4 eggjarauður
0,5 dl sykur

4 eggjahvítur
0,5 dl sykur

2 dl tyrknesk/grísk hrein jógúrt 10% feit

Rjóminn þeyttur ásamt vanillusykrinum. Eggjarauðurnar þeyttar ásamt sykri þartil orðnar örlítið þykkar. Eggjahvíturnar þeyttar þartil farnar að verða stífar, sykrinum svo bætt við smám saman og haldið áfram að þeyta þartil orðnar alveg stífþeyttar.
Rjómanum, rauðusykrinum og jógúrtinni blandað varlega saman og að lokum er hvítunum snúið niður með mestu varúð.

Sett í grunnt form og fryst í 2-3 klst lágmark. Ef lengur má taka fram úr frysti 10 mín áður en á að bera fram og geymt í kæli svo það verði aftur "hálf-frosið".
Skreytt og bragðbætt að vild !

Döðlulambapottréttur að hætti Nigellu

2009-11-21T01:33:00.000-08:00

Tók fram jólakassann minn um daginn. Í þeim kassa eru jólauppskriftablöð og bæklingar undanfarinna ára ásamt stóru jólabókinni hennar Nigellu Lawson. Akkúrat það rétta til að koma mér í jóla(matar)stemmningu ! Nigella vill meina að þessi marakóski pottréttur eigi vel við þegar vetur gengur í garð. Ekki bara útaf lykt og bragði (lambakjöt, döðlur, granatepli) heldur vegna þess að litasamsetningin sé svo hátíðarleg með dökku lambakjötinu, rauða salatinu sem er borið fram með því og grænum kóríandernum.

Því miður vorum við svo gráðug, ég, eiginmaðurinn og matargestirnir, að við höfðum ekki rænu á okkur að taka mynd áður en byrjað var að borða en ég get lofað því að þetta var alveg óheyrilega gott og ekki síður fallegt á að líta.

Döðlulambapottréttur að hætti Nigellu

1 kg lambakjöt af læri, skorið í bita

4 msk olía
2 laukar, saxaðir

1 tsk kanel
1 tsk engifer
1 tsk turmerick/gurkmeja
1 tsk "allspice" (pipartegund sem kallast víst allrahanda á okkar ástkæra ylhýra)
1 tsk cumin

Olían hituð í víðum potti eða á pönnu. Ég nota Le Creuset pottinn minn því svo set ég allt inní ofninn í lokin. Laukurinn mýktur við meðalháan hita í nokkrar mínútur og öllum kryddunum bætt við. Hrært vandlega og látið blandast vel saman við laukinn.

Kjötbitarnir látnir útí og brúnaðir á öllum hliðum. Þetta má gera í 2 atrennum ef kjötið er mikið og/eða potturinn eða pannan af minni gerðinni.

250 g þurrkaðar döðlur (steinninn fjarlægður úr)
2,5 dl granateplasafi (pomegrant juice)
2,5 dl vatn

Þegar allt kjötið er orðið hliðarsteikt (ekki steikja í gegn, bara rétt að fá lit á bitana) er döðlunum bætt við og safanum ásamt vatninu. Saltað. Ég saxaði ekki döðlurnar neitt heldur tók bara steininn úr og leyfði þeim að vera í sínu náttúrulega ástandi ;)

Svo má annaðhvort lækka hitann niður í algjört lágmark eða skella pottinum/pönnunni ef hún er ofnheld inní 150 gráðu heitan ofn og látið malla í minnst 2 klst.

Þennan pottrétt má gera allt að 2 dögum áður og hita svo bara upp rétt áður en á að njóta. Þá þarf jafnvel að bæta smá vatni saman við til að fá sósuna í gang aftur.

Borið fram með bulgur (eða couscous), hoummus og rauðlauks-granatepla"salati".

Granateplasalat
1 rauðlaukur, afhýddur, helmingaður og skorin í örþunna hálfmána
60 ml limesafi
60 ml granateplasafi (annaðhvort það sem kemur af ávextinum sjálfum eða granateplasafi úr fernu)

40 g granateplafræ
ferskur kóríander

Byrjar á að leggja skorinn rauðlaukinn í bleyti í lime- og granateplasafanum. Látið liggja í hálftíma. Laukurinn svo tekin uppúr bleytinu, lagður í skál og granateplafræjunum og kóríandernu stráð yfir.

Bulgur að hætti Yalla
Venjulega sýð ég bara bulgur allsbert eða mögulega með smá kjúklinga eða grænmetiskrafti ef ég vil hafa það bragðmeira.
Prófaði núna að blanda smá kryddblöndu að hætti Nigellu og leiðbeiningunum á pakkningunni (keypti útí tyrkjabúðinni í hverfinu mínu) og það varð sko töluvert betra fyrir vikið.

Byrjaði á því að bræða smá smjör í potti og vellta bulgurnum uppúr því, svipað og maður gerir við risottohrísgrjón. Svo bætti ég við eftirtöldu kryddi, 1/2 tsk af hvoru; kanil, papríka, cumin, kóríander ásamt 2 tsk af salti. Bætti svo við vatni í réttu magni og sauð við lágan hita þartil vatnið var allt gufað upp.

Mandarínukaka með kókoskremi

2009-11-15T09:33:00.000-08:00

Einsog langflestir hafa væntanlega tekið eftir tek ég ávexti frammyfir súkkulaði þegar kemur að bakstri. Reif þessa uppskrift úr einhverju jólablaði í fyrra en náði aldrei að prófa hana áður en klementínu/mandarínu tímabilið kláraðist. Fannst líka afar spennandi að fá að prófa að sjóða heilar mandarínur og mauka þær svo í töfrasprotanum mínum. Þær voru orðnar alveg hressilega mjúkar eftir suðuna í pottinum svo þær urðu auðveldlega að mauki.

Ég var ekki alveg með tímasetninguna á hreinu svo hún var kremsmurð meðan hún var ennþá volg og étin samstundis. Hefði vel mátt standa í kæli áður, held hún sé ennþá betri þannig.

Mandarínukaka með kókoskremi

450 g heilar mandarínur eða klementínur, helst steinalausar

125 g mjúkt smjör

2,5 dl sykur

2 egg

4 dl hveiti

1 tsk (ég ætla að hafa bara hálfa tsk næst) malin nellika

1 dl kókosmjöl

2 tsk "bakpulver" (lyftiduft í minna magni)

Kremið

300 g rjómaostur

3 msk sítrónusafi

0,5 dl flórsykur

0,5 dl kókosmjöl

Smjörsmyrjið og stráið brauðmylsnu inní hringlótt form (ég notaði kókosmjöl í staðinn fyrir mylsnuna).

Skolið heilu mandarínurnar eða klementínurnar vandlega uppúr volgu vatni og setjið í pott. Hellið vatni í pottinn svo þekji ávextina og sjóðið í 6-7 mínútur. Takið uppúr (með töng) og skolið aðeins aftur. Látnar standa og kólna. Maukaðar (já með berki og öllu!) í matvinnsluvél eða með töfrasprota. Verður að þykku ilmandi mauki.

Þeytið saman smjöri og sykri og látið svo eggin útí. Þeytt áfram þartil orðið kremað og fínt.

Blanda saman í skál hveitinu, nelliku, kókos og bakpulvri/lyftidufti. Hrært saman við smjörblönduna ásamt mandarínumaukinu. Hellt í form og bakað í 175 gráðu heitum ofni, neðarlega, í 40 mín.

Kæld VEL áður en kremið er sett á.

GI - sítrónulax með baunasalati

2009-10-27T10:20:00.000-07:00

Biðst fyrirfram afsökunar á myndaleysinu... við vorum bara svo ofurfljót að borða þennan girnilega sítrónulax að það gafst ekki tími til að sækja myndavélina. En ég lofa að þetta er bæði girnilegur og góður réttur sem uppfyllir þar að auki allar GI kröfur :)

Sítrónulax

4 jafn stórir bitar af laxaflaki (1 bita á mann)

1 dl sýrður rjómi (15% er í góðu lagi)
1 dl hafrarjómi (eða matreiðslurjómi en þá er það ekki lengur GI... )
fínrifinn börkur af 1 sítrónu
safi af 1 sítrónu
8 salvíublöð (fersk) fínt hökkuð
1 tsk dijon sinnep
salt og pipar að smekk

Öllu blandað saman og hellt yfir fiskinn sem lagður hefur verið í fat. Inní 225 gráðu heitan ofn í cirka 15 mín.

Baunasalat
1 dós stórar hvítar baunir
1 dós svartar baunir
2-3 gulrætur, skornar í mjóar ræmur (ég nota flysjara og sker svo aftur svo ég fái örmjóa stilka)
3 msk olía
1 msk rauðvínsedik
salt og pipar að smekk

Öllu blandað saman.

GI-Entrecote-steik með greip og avókadósalati

2009-10-03T09:33:00.000-07:00

Það er ekki oft sem ég verð alveg einlægt hissa á að lenda á góðri uppskrift. Þegar uppskriftin uppfyllir svo líka skilyrðin að vera bragðgóð, með lágt GI-hlutfall (kolvetnalítil, með súrum ávexti) og koma virkilega á óvart með óvæntu innihaldi (greip í baunasalati!) þá er gleðin sönn :)

Þessa uppskrift var að finna í DN, birt í samvinnu við uppáhalds matartímaritið mitt LagaLätt.

Íslenskuð hér með;

Entrecote með greip og avókadósalati

1 entrecote steik á mann, kryddaðar með

1 tsk karrí

1 tsk chillíflögur

1 tsk hunang

salt og pipar, olía

Ég var með tvær stórar steikur og makaði fyrst hunanginu á þær áður en ég bar á þær karrí og chillí. Olía hituð á pönnu og steikurnar steiktar. Kryddaðar með salti og pipar meðan þær eru á pönnunni. Steiktar eftir smekk hvers og eins og svo leyft að hvíla nokkrar mínútur á pönnunni (ekki á hellunni þó!) með loki ofaná. Þá kemur smá kjötsafi í pönnuna sem má annaðhvort hella beint ofaná steikurnar þegar þær eru komnar á diskinn eða þykkja örlítið með því að setja smá sósuþykkni beint útá pönnuna (steikurnar teknar af að sjálfsögðu) og hræra... gæti þurfti að setja smá hita undir pönnuna. Hella svo sósunni ofaná steikurnar.

Salat

2 lítil avókadó, skorin í hæfilega bita

1 askja kirsuberjatómatar, helmingaðir

1 dós stórar hvítar baunir eða Cannelini baunir

1 mozzarellaostur, skorin í hæfilega bita (eða nota mínímozzarellakúlur)

1 greip, hýðið og allt það hvíta skorið utanaf og svo skorið í báta. Til að fá nákvæmar leiðbeiningar um hvernig þetta er gert (vel þess virði að tileinka sér þetta!) má kíkja á vídeó hér.

2 msk olía, salt og pipar.

Öllu innihaldi blandað saman og borið fram með steikinni.

Birkirúnstykki

2009-09-27T07:35:00.000-07:00

Brauðbakstur er sko nýja trendið hjá mér þessa dagana. Er búin að birgja mig upp af bæði fersku geri og þurrgeri til að geta seðjað hef-þörfina mína. Fyndið að segja frá því en ég er búin að finna alveg æðislegan hef-stað í eldhúsinu mínu. Í þeim íbúðum sem ég hef átt heima í hefur þessi staður oft verið í baðherberginu ef þar er gólfhiti eða uppvið stofuofn. Ágætt að hafa smá svona hlýju í gangi. Hér er hinsvegar engin gólfhiti og ofnarnir ekki í gangi á sumrin svo það er vandfundin hlýr hefunarstaður. Þartil mér datt í hug að prófa eldhússkápinn fyrir ofan frystirinn ! Augljóslega gefur frystirinn frá sér svona fína hlýju því þarna uppi hefast mjög vel. Og hrærivélaskálin kemst alveg akkúrat fyrir þarna.... fullkomið alveg.

Í dag eru semsagt birkirúnstykki á dagskrá. Fann uppskrift sem mér leist vel á en fannst bara magnið vera dáldið vel mikið svo ég helmingaði það. Notaðist við þetta:

25 g ger (hálfur pakki af fersku sænsku)
25 g smjör
3,5 dl vatn

1/2 egg (sló eggið með gaffli í skál og cirkaði svo bara á helmingin... hinn helmingurinn geymdur til að pensla rúnstykkin með áður en þau fara inní ofn)

1/2 tsk salt
1/2 tsk sykur

500 g hveiti

Gerið mulið oní skál, smjörið brætt í potti og vatninu blandað saman við, velgt þartil fingurhita er náð (37 gráður, mér finnst ágætt að nota hitamæli.. kjöthitamælir virkar líka á vökva ;)). Hellt yfir gerið svo það leysist upp í vökvanum.

Hnoðað í vél ásamt hveitinu og sykrinum. Hálfa egginu bætt við og unnið aðeins áfram og að lokum saltinu. Það eru víst einhver bakaravísindi sem segja að saltið eigi að fara síðast í þegar deigið er búið að vinnast aðeins saman.

Hnoðað hressilega í 10 mín, 15 mín ef maður er að handhnoða.

Deigið er núna dáldið klístrað og blautt en það er í góðu lagi. Á ekkert að "sleppa skálinni". Setti plastfilmu yfir skálina og tvöfalt viskustykki. Látið hefast á hlýjum og góðum stað í 30-45 mín eða þartil uppblásið og tvöfalt í stærð.

Handhnoðað á vel hveitistráðu borði en þó ekki svo mikið að það tapi léttleikanum. Maður á bara rétt að kasta það milli handa sér svo maður geti handleikið það. Skipt í þrennt og hverjum bita aftur í 5 bita. Bollur rúllaðar með léttum handahreyfingum (gott að hafa mikið hveiti á höndunum) og settar á bökunarplötu. Látið hefast aftur í 20-30 mín.

Penslað með eggi og birkifræjum (vallmofrö) stráð yfir.

Bakað í 225 gráðu heitum ofni í 15 mín.

Apríkósubrauð með furuhnetum

2009-09-20T09:26:00.000-07:00

Núna þegar ég er í mínu gjöfula og frjósama ástandi virðist ég leikandi létt geta bakað brauð sem lyfta sér og hefast einsog þau eigi lífið að leysa. Og ekki verður útkoman bragðvond heldur.

Ég lagði í þetta brauð rétt eftir hádegi og leyfði því að hefast alveg til kl 4. Kannski þess vegna sem það hafi lyft sér svona vel ? ;) Var svo borðað með rauðbeðusúpu kvöldsins.

Apríkósubrauð með furuhnetum

1 dl þurrkaðar apríkósur, lagðar í bleyti í þónokkra stund... gjarna nokkra klukkutíma en mér lá á svo ég lét hálftíma nægja

1/4 pakki ger (1 heill pakki hvort sem er þurrger eða ferskt er oftast 50 g)
3,25 dl volgt vatn
2 tsk salt
8 dl hveiti + 1/2 dl eða meir til að hnoða úr
1 dl furuhnetur

Gerið leyst upp í volgu (37 gráður) vatninu og salti og hveiti bætt við. Hnoðað 10 mín í hrærivél eða 15 mín í höndunum. Apríkósurnar teknar uppúr vatninu og saxaðar gróft. Þeim ásamt furuhnetunum þarf síðan að handhnoða í deigið, nota afganginn af hveitinu til þess að fá deigið lipurt í höndunum á manni. Má samt alveg vera dálítið blautt þegar það fer í skálina aftur svo ekki ofhnoða neitt.
Látið lyfta sér í minnst 1 klst eða þartil tvöfaldast í stærð.

Tekið uppúr skálinni og formaður 1 vænn hleifur, takið skæri og klippið rifur í hleifinn hér og þar ("kottar" kallast það á sænsku). Látið lyfta sér aftur í hálftíma.
Ofninn hitaður í 250 gráður. Brauðið sett inn í og smá vatni skvett eða spreyað inní ofninn rétt áður en hurðinni er lokað. Lækkað niður í 200 og bakað í 30-35 mín eða þartil brauðið er orðið gyllt á litinn og fullbakað (holt hljóð heyrist þegar það er bankað í það).

Að sjálfsögðu er þetta brauð alveg ótemjandi gott með smá smjöri oná ;)

Gulrótarbuff með apríkósum

2009-08-30T09:33:00.000-07:00

Ég er fyrir löngu búin að sannreyna kosti þess að borða grænmetismat... allavega svona einusinni í viku til að breyta til.
Í kvöld gerði ég gulrótarbuff eftir uppskrift sem ég hafði skrifað hjá mér uppúr einhverju blaði... Gestgjafanum ef mig misminnir ekki. Breyti innihaldslýsingunni örlítið til að barnvæna buffin en mér fannst það alls ekki koma að sök. Fann svo extra mikla gleði í því að geta fengið að nota eldhúsgræju sem ég fæ sjaldan tækifæri (eða man eftir) að nota; gufusoðsgrind. Algjör snilld að gufusjóða gulræturnar sem fara í buffin því þá eru þau passlega "þurr" að suðu lokinni og buffin urðu stinn og fín (sjá mynd). Dáldið mikið sem þurfti að saxa fínt og þá misnotaði ég töfrasprotan bara (litlu skálina). Frekar þæginlegt og sparaði mér saxeríið ;)

Gulrótarbuff með apríkósum
gera 8 buff

8-10 gulrætur, skornar í tvennt og soðnar (gjarnan gufu) þartil mjúkar
2 brauðsneiðar, skorpan skorin af og blitzað í matvinnsluvél svo verði að brauðmylsnu
1 ferskt chillí, fræhreinsað og saxað fínt (ég sleppti þessu)
6-8 þurrkaðar apríkósur, saxaðar fínt
4 vorlaukar, saxaðir fínt
2 hvítlauksgeirar, saxaðir fínt
3 msk furuhnetur
1 egg
3 msk söxuð steinselja (sleppti líka)
Gulræturnar maukaðar og kældar örlítið, öllu svo blandað saman og búin til 8 buff. Þeim vellt uppúr hveiti og steikt á pönnu uppúr olíu, 5 mín á hvorri hlið.

Bar fram með jógúrtsósu;
2,5 dl þykk jógúrt, safi úr 1/2 sítrónu, 1 tsk hunang og 2-3 msk söxuð mynta eða kóríander.

og baunasalati;
1 stór dós Cannelinibaunir, 1 lítil dós nýrnabaunir, 1 avókadó (skorið í bita), 1 appelsína (skorin í bita) og smá safi af henni, 1-2 msk olía, 1-2 msk hvítvínsedik, salt og pipar.

og hráhrísgrjónum....

Sítrónupasta með avocado og hrognum

2009-08-24T11:44:00.000-07:00

Við hjónakornin fengum tækifæri til að fara á smá hversdagsdeit á eigin heimili. Samanstóð af því að gefa undrabarninu okkar að borða barnheldan mat klukkan sex, svæfa hann og borða svo sjálf einhvað "fullorðins" í friði og ró.

Gerði lauflétta sítrónupastasósu sem var borin fram með steinbítshrognum og avocado. Næstum svo auðvelt að það er skömm að því að kalla þetta uppskrift en ég kalla þetta þá bara leiðbeiningar og hér má lesa þær:

Sítrónupasta
(úr LagaLätt)

2 dl 15% sýrður rjómi
fínrifinn börkur af 1 sítrónu og tæplega matskeið af sítrónusafa (meira ef vill, ágætt að smakka til aðeins)
1 teningur af fiskikrafti eða slurkur af fljótandi krafti því samsvarandi (1 msk?)
Allt hitað varlega í potti og smakkað til með salti og pipar.
Tagliatelle pasta soðið skv. leiðbeiningum og sósunni blandað saman við.

Lagt uppá diska og fínskornum rauðlauk, avocadobitar, ferskmalaður pipar og slettu (rúma teskeið) af ferskum rauðum steinbítshrognum (stenbitsrom) smellt ofaná sem endaslettu á listaverki.

Baka með rabbabara, beikoni og brie

2009-08-19T10:58:00.000-07:00

Sat uppi með smá rabbabara og var komin hálfa leið með að gera klassíska mylsnuböku (smulpaj) þegar ég rak augun í gamla úrklippu úr Gestgjafanum sem ég bara VARÐ að prófa strax næsta dag.
Í morgun bakaði ég því böku sem svo var borðuð með góðu salati í kvöld. Óhemjugott ! Á örugglega eftir að gera þessa í næsta saumó í staðinn fyrir heitan brauðrétt...

Baka með rabbabara, beikoni og brie
(úr Gestgjafanum)

Botninn:
125 g smjör
3,5 dl hveiti
2 msk kalt vatn

Öllu hnoðað saman (notaði matvinnsluvél) og þrýst út í smelluform eða eldfast mót. Pikka í botninn með gaffli og geyma í kæli í 30 mín. Forbakað svo í 15 mín við 200 gráður.

Fyllingin:
200 g beikon, steikt þartil stökkt og skorið í litla bita
1 stór laukur, skorin í þunnar sneiðar og steikt örlitla stund á sömu pönnu og beikonið (tekur bragð úr beikoninu... nammmm)

1 dós sýrður rjómi (notaði 35%)
3 egg
salt og pipar

150-200 g rabbabari, skorin í litla bita
1 brie ostur (150-200 g)
ferskt timjan

Beikoninu og lauknum raðað fyrst oní forbakaðan botninn. Sýrða rjómanum og eggjunum hrært saman og saltað og piprað. Þessu hellt ofan á beikonið og laukinn. Rabbabaranum svo dreift ofaná og brie osturinn skorinn í þunnar sneiðar og lagðar yfir herlegheitin. Fersku timjani dreift yfir og bakað svo við 200 gráður í 25-30 mín.

Kräftpastasósa

2009-08-12T08:43:00.000-07:00

Þessi pastasósa er eiginlega dáldið mjög sænsk... veit eiginlega ekki einusinni hvort það sé hægt að heimfæra á íslensk hráefni þegar þarna er að finna bæði kräftor (ferskvatnskrabbi) og västerbottenostur (sérstakur sænskur harðostur).

En fyrir ykkur lesendur sem búið í Svíþjóð ætti að vera lítið mál að snara þessu saman :)

Kräftpastasósa
úr einhverju gömlu SvD blaði...

200 g kräftstjärtar (ég nota reyndar 300 g því ég vil hafa vel af því í skammtinum mínum)
100 g ferskar sykurbaunir - sockerärtor
2 skallottlaukar
1 msk smjör
2 dl sýrður rjómi
1/2 msk (eða meir, fer eftir smekk) fljótandi humarkraftur
1,5 dl rifinn västerbottenostur (fæst tilbúin rifinn í poka og ég nota allan pokann... 3 dl ?)
1 msk dill, hakkað
salt og pipar eftir smekk

Laukurinn hakkaður smátt og smjörið brætt í pott. Laukurinn léttsteiktur uppúr smjörinu þartil glær. Sykurbaunirnar skornar í tvennt á ská og skellt útí pottinn. Steikt nokkrar mínútur til viðbótar. Svo er sýrða rjómanum og humarkraftinum bætt útí og þynnt með smá vatni... fer eftir hvað maður vill þunna sósu.. kannski 0,5-1 dl ?
Osturinn settur útí og hitað í gegn þartil hann bráðnar og samlagast sósunni.
Kräftunum skellt útí rétt áður en bera á fram og smakkað til með dilli, salti og pipar.

Mumsfílíbaba !

Jógúrtmaríneringar x 3

2009-07-30T01:36:00.001-07:00

Rifjaðist upp fyrir mér í hreint yndislegu matarboði hjá góðum vinum hversu bragðgóður og meyr kjúklingur verður ef hann fær að marínerast í jógúrt áður en honum er skellt á grillið. Er búin að endurtaka all-oft (of oft ?) síðan þá og í gær toppaði ég allt með því að gera mína eigin útfærslu... og það úr óhemju góðri kókósjógúrt úr Willy´s !

Svo hér eru þrjár í uppáhaldi, aðferðafræðin er sú sama... öllu innihaldi blandað saman í poka, kjúklingurinn (annaðhvort heill, niðurbútaður eða bringur) látið ofaní og látið standa helst í kæli yfir nótt en í neyð má láta 30 min-2 klst við stofuhita nægja :

Nigellujógúrtmarínering (einnig þekkt sem Bromstensmaríneringin)

500 ml jógúrt
60 ml olía
2 heil hvítlauksrif, léttilega marin (ekki kreist, kramin eða skorin)
1 msk heil piparkorn, marin (eða aðeins minna úr kvörninni)
1 msk salt
1 tsk cummin
1 msk síróp (maple eða ahorn helst... ekki pönnukökusíróp)

Salvíumarínering
úr LagaLätt
500 ml jógúrt eða léttjógúrt
4 hvítlauksrif, kramin
15 fersk salvíublöð, saxað
1,5 tsk salt
smá pipar úr kvörn
2 msk olía

Beggumarínering

500 ml Kókosjógúrt (fæst frá Milko í Willys)
2 hvítlauksrif, kramin
salt og pipar
2 tsk Vindaloo kryddblanda (mín er frá Pottagöldrum).... ef bara fullorðnir eru að fara að borða má auka magnið allverulega
2 tsk sojasósa

Einfalt sumarpasta

2009-07-22T10:05:00.000-07:00

Fyrir mörgum mörgum árum síðan eyddum við Ingó 2 vikum í Brussel. Sú borg er matgæðingshöfuðborg Evrópu. Dvalarlengdin þar er ekki talin í vikum, mánuðum eða árum heldur kílóum. Þar komumst við líka í fyrsta sinn í kynni við alvöru matvöruverslun á útlenska vísu sem bauð uppá allt sem hugurinn girndist; Carrefour.
Þó við færum mikið út að borða fannst mér næstum því alveg jafn gaman að fá að versla einhvað í matinn og elda í íbúðinni sem við vorum með í láni (frá elsku hjartans Brynju). Sá réttur sem helst stendur uppúr frá þessari ferð er einfaldasti og bestasti sumarforréttur í heimi... niðurskorin Buffalo-Mozzarella með tómötum, basilíku og olíu.

Í kvöld gerði ég pastarétt sem minnti óneitanlega á Brusseluppáhaldið okkar. 10 mín max að búa til, ágætt í sumarletihitanum ;)

Mozzarellapasta
Magnið er ca fyrir 3...

Sjóða slatta af pasta
2 hvítlauksrif, skorin í þunnar sneiðar
1 lítil askja af kokteiltómötum, skornir í tvennt
safinn úr 1/2 sítrónu
væn handfylli af ferskri basillíku
2 kúlur af mozzarellaosti
væææn handfylli af nýrifnum parmesanosti
slatti af furuhnetum

Mýkti hvítlaukinn aðeins uppúr olíu í djúpum potti. Skellti útí tómötunum og leyfði þeim aðeins að hitna, sítrónusafi útí og svo pastað. Svo barasta skellti ég útí restinni; reif aðeins niður basilíkublöðin, reif líka niður mozzarellakúlurnar í smá klípur, parmesanosturinn og furuhneturnar. Hrærasmá og leyfa aðeins að hitna í gegn.
Pipar og salt.
Easy.

Kjúklingasalat

2009-07-08T02:28:00.000-07:00

Á sumarletidögum erum við aðeins duglegri við að kaupa tilbúinn grillaðan kjúkling og hafa í kvöldmat, losnar við að standa og steikja, og ekki er nú verra að það er ódýrara en að kaupa hráefnið og gera allt frá grunni :)
Og þá vill nú verða að maður eigi smá afgang af kjúklingakjötinu. Upplagt að búa til smá salat til að hafa oná brauð, tilvalið í pikknikk og alveg hrikalega gott.
Svíarnir kalla by the way svona salat "röra" eða hræru. Svona til þess að aðgreina frá grænu salati. Hvað ætli Íslenska samheitið á því yrði ? Kjúklingahræra hljómar dáldið furðulega....

Tek fram að þegar ég geri salatið fer ég ákaflega frjálslega með innihaldsmagnið en hérna er upprunalega uppskriftin einsog hún stendur handskrifuð í bókinni minni góðu ;

Kjúklingasalat
120 g kjúklingakjöt, skorið í bita
1/3 bolli bitaskorin paprika, gul eða rauð
2 msk ristaðar furuhnetur
1/4 bolli hrein jógúrt
3 msk létt mæjónes
1 tsk sítrónusafi
1 tsk ferskt basilíkum, saxað (ég nota "ferskt" úr frysti)
1/2 tsk aromat

Bakaður fiskur með kotasælu

2009-06-01T11:25:00.000-07:00

Þegar ég var heima um páskana rakst ég á þessa líka girnilegu uppskrift frá MS í Fréttablaðinu. Sá að það var kotasæla með hvítlauk og datt í hug að það gæti verið einhvað svipað til hérna í Svíþjóðinni... og jújú "keso med paprika" fékk að koma í staðinn fyrir íslensku hvítlaukskotasæluna. Ný uppáhaldsfiskiuppskrift !

Bakaður fiskur með kotasælu og sýrðum rjóma
(upprunalega uppskriftin hér)

600 g ýsuflök, skorin í bita
100 g blaðlaukur, smátt saxaður
1 rauð papríka, söxuð
200 g rækjur
180 g sýrður rjómi
200 g keso með papríku
2 dl söxuð basilíka (má sleppa finnst mér ef sænska kesóið er notað því í því er mikið af kryddjurtum)
100 g gratínostur

Fiskurinn settur í eldfast mót ásamt grænmetinu og rækjunum. Kesóið og sýrði rjóminn hrært saman ásamt basilíkunni ef hún er notuð. Hellt yfir fiskinn og osti stráð yfir. Baka við 180 í 20 - 30 mín eða þartil fiskurinn er orðin hvítur og gegnumsoðin.

Nektarínusalat með rækjum

2009-05-28T21:54:00.000-07:00

Sumarið er salattími finnst mér. Lágmark einu sinni í viku. Einhvað létt og gott svo maður geti hlaupið útí sólina aftur og notið dagsins.

Ég get verið alveg óhugnalega hugmyndasnauð þegar kemur að því að gera salat en sem betur fer er uppáhalds blaðið mitt LagaLätt oft með góðar hugmyndir. Eins og til dæmis þetta salat sem var svo ferskt og fínt með nektarínum, hvítlauks og chillí steiktum rækjum og fetaosti.
Innihaldslýsing fylgir hér:

- Nektarínur skornar í báta
- blandað salat skolað og sett í skálina ásamt
- rauðlauk
- létt soðnum sykurbaunum (sockerärtor/sugar snap peas)
- slatti af rækjum teknar (affrystar ef þær koma þaðan) og léttsteiktar uppúr smá olíu og hvítlauksrifi. Í lokin er smá sweet-chillí sósu hellt útá pönnuna.
- fetaostur mulinn ofaná öll herlegheitin í skálinni.

Sjálfsþurftarbúskapur

2009-05-28T10:44:00.000-07:00

Það er smá organísk óðlun í gangi hjá mér úti á svölum. Keypti poka af organískri mold útí búð og sáði oní stóra málmbalann sem lá ónotaður og sorgmæddur inní geymslu... kom ótrúlega fljótt upp litlir grænir og viðkvæmir þræðir sem svo brögguðust í þetta líka myndarlega ruccolalauf.
Balinn hefur fengið að standa útá svalarborði og notið góðs af rigningunni ... gerist ekki meir lífrænt en svo ;)

Fengum okkur í dag útá uppáhalds rauðbeðusalatið mitt. Óhemju gott alveg og vel ræktunarinnar virði.

Rauðbeðusalatið svona ef ég er ekki búin að birta það nú þegar;

Nokkrar ferskar rauðbeður soðnar þartil mjúkar, skrælaðar og skornar í bita.
1 rauðlaukur skorin í þunnar sneiðar og látið liggja í 2 msk balsamico + 2 msk olíu + salti og pipar. Rauðbeðunum bætt útí, gjarnan þegar þær eru heitar því þá draga þær í sig bragðið af vökvanum.
Sýð quinoa, hráhrísgrjón, couscous eða búlgur með smá grænmetiskrafti í.
Raða svo saman grjónum og ruccola á disk og toppa með rauðbeðu/rauðlauksblöndunni. Oná þetta fer svo fetaostur eða geitarostur og saxaðar valhnetur.

Rababaramylsubaka (smulpaj)

2009-05-16T08:01:00.000-07:00

Ein af uppáhalds uppskriftabókunum mínum heitir "Smulpajer till kaffe och dessert". Hellingur af bæði klassískum og öðruvísi mylsnubökum sem eru hver annari auðveldari og betri. Hef gert held ég 3 eða 4 uppskriftir úr þessari bók sem allar hafa slegið í gegn. Ætla að byrja á að lauma hingað rabbabaramylsnubökunni sem ég gerði í saumó í gær... en lofa svo fleiri bráðum... peru eða mangóböku kannski ?

Rabbabara"smulpaj" med möndlumassa

200 g möndlumassi, rifinn gróft (mér fannst reyndar að það hefði mátt minka þetta niður í 150g)

150 g kalt smjör

1,5 dl sykur (minkaði líka þarna niður í 1,2... hefði alveg mátt vera meiri minnkun)

2,5 dl hveiti

Hitið ofninn upp í 175 gráður. Blanda saman með fingrunum svo verði að grófri mylsu öllu sem talið er upp að ofan. Setja helminginn svo í pæjform og baka í ofninum í 7-8 mínútur. Taka formið útúr ofninum og setja svo fyllinguna í;

fyllingin

4 rabbabarastilkar, miðlungsstórir, skornir í bita

1 cm ferskt engifer, rifið (eða bara rifinn engifer úr dós einsog ég geri, þá notaði ég tæplega teskeið)

1 msk kartöflumjöl

0,5 dl sykur

Allt ofantalið sett saman í skál og hrært svo blandist vel saman.

Fyllingin sett í og restinni af mylsnudeiginu sett ofaná. Bakað í 25-30 mín. Bera fram með vanilluís, vanillusósu, rjóma eða kesella.

Bullukollubrauðréttur

2009-05-15T14:24:00.001-07:00

Var með saumó í kvöld og lofaði viðstöddum að setja inn tvær uppskriftir. Ein af þeim var "bullukolluuppskrift" sem þýðir að ég setti dash af hinu og slettu af öðru með lauslega ímynd af einhverri uppskrift að brauðrétt sem ég hafði fundið. Ákvað að best væri nú bara að skrifa það niður strax svona ef ské kynni að ég fengi blackout á morgun þegar ég ætlaði að fara að rifja upp.

So here goes....

Bullukollubrauðréttur
1 stórt fat

3/4 af risafranskbrauði (skorpan líka !) Reytt í tætlur oní formið
2 rauðar papríkur, skornar í bita
1 vorlaukur, sneiddur
2 pakkar af reyktri skinku
2 x 200 g öskjur af hvítlauksrjómaosti (ég notaði ICA´s med vitlök och örter)
1 poki af rifnum osti
svo kemur cirkabátið; 5 dl af rjóma af ýmsri gerð (ég átti smá þeytirjóma og smá hafrarjóma og smá filmjölk/súrmjólk)
Bara þartil manni finnst að þykktin sé orðin hæfileg. Á að vera dálítið vökvakennt því að brauðið sýgur upp mikinn vökva.

Steikir fyrst á pönnu uppúr smá olíu papríkuna og vorlaukinn. Bætir svo útí þetta skinkunni og rjómaostinum þartil hann fer aðeins að bráðna. Svo hella útí vökvanum (rjómanum og því).
Hella þessu öllu svo yfir brauðið í forminu. Hræra aðeins um þartil brauðið er allt vel blautt af rjómaostablöndunni. Drussa yfir osti og krydda með valfríu kryddi (Season All, papríkudufti eða töfrakryddi frá Pottagöldrum ef maður býr svo vel ;))

Hita í 200 gráðu heitum ofni í 30 mín eða þartil osturinn er bráðnaður og aðeins farið að taka lit.

Haframjölskökur með rabbabara

2009-05-09T21:52:00.000-07:00

Smákökur eru dáldið jólajóla en hey !, það eru til sumarsmákökur líka og þessar eru pottþétt í þeim flokki.
Ég fór eftir uppskrift sem ég fann í nýjasta Arla bæklingnum en ég myndi minnka sykurmagnið dáldið næst. Fljótgert og meira að segja barnvænt því Hilmi tókst að hjálpa án þess að nokkuð færi úrskeiðis. Fínn í kúlurúllið.

Haframjölskökur með rabbabara
ca 25-30 stk

150 g smjör, við stofuhita
1 dl sykur (má gjarnan vera minna!)
Hræra þessu tvennu vel saman og bæta svo við;
2 dl haframjöl
2 dl hveiti

1 nettur rabbabarastöngull

Forma litla kúlur úr deiginu og setja á bökunarplötu. Skera rabbabarann í litla bita (1 cm) og þrýsta einum bita oní hverja kúlu. Klessa kúluna í leiðinni örlítið niður. Baka í 200 gráðu heitum ofni í cirka 10 mín.

Cajun Chowder

2009-04-30T22:58:00.000-07:00

Chowder er súpa. Munurinn á chowder og súpu er að sú fyrri er aðeins þykkari.
Fyrsta súpan sem ég prófa úr nýju bókinni minni "Soppor, bröd och röror" varð semsagt Cajun Chowder. Þrælamerísk skelfiskssúpa með cayennepiparkeim. Mjög góð og ferlega ólík þeim fiskisúpum sem ég hef gert áður.
Í uppskriftinni eru ferskvatnsrækjur (kräftor) sem eru vinsælar hérna í Svíþjóð en ég efast ekki um að góðar, heiðarlegar rækjur séu engu verri.

Cajun Chowder
fyrir 4 eða fleiri

1 laukur, saxaður
1 hvítlauksrif, kramið
2 msk olía
fingurgómaklípa af svörtum pipar
fingurgómaklípa af hvítum pipar
væn fingurgómaklípa af möldum kóríander
væn fingurgómaklípa af cayennepipar
1/2 tsk malin paprika
1 lítill sellerístöngull (sleppti þessu því ég nennti ekki að kaupa heilan selleríhaus)
1 dós saxaðir tómatar
2 dósir gulur maís
2 lítrar af grænmetiskraftsvatni (ég lét nægja 1 l því við vorum bara 2 fullorðnir)
ca 300 g sterk pylsa einsog t.d. Chorizo
1 dós krabbakjöt
100 g kräftor (rækjur)
2 dl matreiðslurjómi
salt

Laukurinn og hvítlaukur hitaðir uppúr olíunni örlitla stund. Kryddunum öllum bætt út í og leyft að taka sig aðeins saman. Saxaði sellerístöngullinn (ef notaður) lagður oní ásamt dósatómötunum, majs og grænmetiskraftsvatninu. Leyft að malla í 20 mín.
Þá má mixa súpuna. Höfundar bókarinnar lögðu til að þriðjungur af súpunni væri tekin uppúr og sléttmixað, bætt svo við restina. Ég dýfði nú bara töfrasprotanum mínum oní og blastaði á fullum krafti þartil mér fannst rétta þykkleikanum náð. Það eiga nefnilega að vera smá bitar í súpunni, hún á ekki alveg að vera sléttmixuð.... þú prófar þig áfram ;)
Sterka pylsan er skorin í bita og bætt við oní súpuna ásamt krabbakjötinu, rækjunum og rjóma. Látið hitna í gegn og smakkað til með salti.
Við hjónin erum soddan chillíelskendur að okkur fannst cajunpiparinn ekki alveg gefa nógu gott kikk svo við helltum Tabasco frjálslega oní súpudiskana okkar.
Núna bíður smá afgangur af þessari góðu þykku súpu inní ísskáp og ég er alveg handviss um að hún eigi eftir að verða betri svona dagsgömul.... mmm.

Eplabrauð á 5 mín

2009-04-26T00:48:00.000-07:00

Skellti í eitt stykki eplabrauð hérna í morgunsárinu sem ég ætla svo að njóta með hádegismatnum (sem verður skærgræn og fín grænbaunasúpa með pestói). Kom mér á óvart hvað ég var fljót að henda í þetta þarna oní hrærivélaskálinni og mér til mikillar ánægju var ekkert ger í þessu brauð (ég á mjög erfitt með að nota ferskt ger áður en það rennur út og litla sem enga þolinmæði í að láta það lyfta sér heldur).

Brauðið er svo troðfullt af góðum hlutum einsog spelti, jógúrt, hörfræjum og eplum. Gerist varla betra ;)

Eplabrauð

1 hleifur

2 dl haframjöl (já, einsog mar gerir graut úr)

2,5 dl spelt, fínmalað

2,5 dl spelt, grófmalað

0,5 dl hörfræ

0,5 dl sólrósakjarnar

1 tsk salt

2 tsk bikarbonat/natron

Öllu þessu er blandað saman í hrærivélaskál eða barasta skál ef þú ætlar að handhræra... sem er vissulega óflókið og gaman ef mar vill vera extra húslegur.

1 grófrifið epli

1 msk hunang, fljótandi

4 dl óbragðbætt naturell jógúrt

Þessu blandað saman í sérskál og svo saman við þurrefnin að ofan. Hræra þartil allt blandað saman og hella í vel smurt og "bröað" (ég átti ekki brauðmylsnu svo ég notaði kókosmjöl) brauðform. Baka við 175 gráður neðarlega í ofninum í 80 mín.

Rúgbrauðsterta með rjóma

2009-04-16T05:48:00.000-07:00

Las gömul Gestgjafablöð um páskana og um leið og ég sá uppskriftina að RÚGBRAUÐS-tertu þá bara varð ég að prófa. Hverjum datt þetta eiginlega í hug ?! Rúgbrauð með rjóma á ? En þetta kom þvílíkt á óvart og varð alveg óheyrilega gott.
Uppskriftina er að finna hér. Reyndar var hún pínu öðruvísi í Gestgjafanum því þar voru eggjarauðurnar þeyttar sér með sykrinum, eggjahvíturnar stífþeyttar og þær svo látnar út í deigið síðast. Botnarnir voru bakaðir í 3 smelluformum en næst myndi ég láta 2 nægja... í 3 urðu botnarnir óþarflega þunnir. Þeyta svo pela af rjóma með rifnu suðusúkkulaði í til að setja á milli.
Þjóðlegt með meiru !

Lemon curd - sítrónukrem

2009-04-16T00:32:00.000-07:00

Bjó til eigið sítrónukrem um páskana sem ég setti svo í sítrónupæj með berjamarenstoppi. Sjálft pæjið var ákaflega fallegt en lak dálítið þegar það náði stofuhita og það var búið að skera nokkrar sneiðar í burtu. En sítrónukremið ! Ó sítrónukremið... það var megagott. Var svo heppin að kremið varð meira en reiknað var með svo ég eignaðist þarna skyndilega nokkrar krukkur í afgang ;) Það var prófað oná ristað brauð, með nýbökuðum brauðbollum, með ferskum jarðaberjum og amerískum brunchpönnukökum. *smjatt*

Nú svona eftirá þegar ég fór að skoða hversu lengi þetta geymist þá er sagt "vika í ísskáp" og þá er nú kannski eins gott að búa bara til lítinn skammt við extra góð tilfelli enda er þetta nú ekki beint hollt... en þeim mun betra ;)

Lemon curd

einn lítill skammtur

3 sítrónur

1,5 dl sykur

50 g smjör

2 msk maizenamjöl

2 heil egg

2 eggjarauður

Fínrifinn börkur af 3 sítrónum sett í pott ásamt safanum af 2 sítrónum, allur sykurinn og smjörið líka. Hitað þartil sykurinn er búin að leysast upp. Börkurinn siktaður frá og vökvinn settur aftur í pottinn.

Maizenamjölið er hrært út í safann af síðustu sítrónuninni og að lokum hellt út í pottinn.

Svo kemur mest spennandi hlutinn !

2 heil egg og 2 eggjarauður eru hrærðar saman léttilega. Sett út í heitan/volgan vökvan í pottinum smám saman og hrært stöðugt í á meðan. Þegar öll eggin eru komin út í má hita við vægan hita aftur, hræra stöðugt í og bíða eftir að þykkni. Þetta ætti að þykkna á nokkrum mínútum. Fyrir þá sem vilja fara enn varlegar að þessari aðferð má gera þetta yfir vatnsbaði en þá nær maður að stjórna hitanum enn betur en þegar kremið er ofan í potti.

Svo er þykku kreminu hellt í hreinar krukkur og látið stífna inni í ísskáp.

Gott með öllu !

Graskerssalat með miðausturlensku ívafi

2009-02-18T11:24:00.000-08:00

Bullaði fram þetta ágætis salat í gærkvöldi. Veit ekki hvort það sé hægt að endurgera það á Íslandi með góðu móti þar sem halloumi ostur fékst ekki á landinu síðast þegar ég vissi (sú í ostabúðinni á Skólavörðustíg hafði ekki einusinni heyrt á ostinn minnstann!).
Halloumi er saltur, gúmmíkenndur og gerður úr blöndu af geitar og kindamjólk. Hann er bestur grillaður.

Ég tók semsagt vænan graskersbita og skar niður í hæfilega stóra/litla bita. Setti í ofnskúffu, kryddaði með harissu (alveg eins hægt að nota smá fræhreinsað, smátt saxað chillí), salti og pipar. Dreitlaði svo yfir olíu og hunangi. Ofninn á 200 gráður og látið vera inni í 45 mín... eða meira...bitarnir eiga að verða mjúkir. Svona einsog að ofnsteikja kartöflur !

Lét svo ruccola (klettasalat) á stórt fat. Þegar graskerið kom útúr ofninum lét ég þær vandlega dreifðar ofaná og drussaði svo yfir þurrkuðum graskersfræjum og rúsínum. Steikti svo einn pakka af halloumiosti á grillpönnu (ekkert krydd, engin olía) þartil tók lit á báðum hliðum. Skar niður í bita og dreifði þeim yfir. Í blálokin kreisti ég safann úr hálfri appelsínu yfir herlegheitin og saltaði og pipraði.

Þetta toppaði kvöldmatinn hjá okkur sem samanstóð af ósköp stöðluðum og boring heilsteiktum kjúlla krydduðum með kanil, cummin, hvítlauk ofl.

Kjúklingapottréttur með karabísku ívafi

2009-01-26T09:12:00.000-08:00

Vá hvað ég á aldrei aftur eftir að kaupa svona Madhur Jaffrey/Uncle Ben´s tilbúnar dósasósur. Aldrei aftur !!
Þessa uppskrift reif ég úr einhverju gömlu Gestgjafablaði, magnið var miðað við 10-15 en ég minnkaði bara niður svo myndi samsvara minni fjölskyldu. Við átum yfir okkur og svo átti ég smá í box fyrir hádegið daginn eftir.

Kjúklingapottréttur með kókos og mangó
(tekið úr Gestgjafanum, magni breytt til að hæfa 4)

Kjúklingabringur sem nægir fyrir 4, skorið í teninga
1 lítill laukur
2 hvítlauksrif, kramin
1 msk engifer, ferskt, rifið (ég nota úr dós)
1 tsk kóríanderduft
1 dós kókosmjólk
1 dós niðursoðnir saxaðir tómatar, safinn siktaður frá... eða meirihlutinn af honum allavega
1 mangó, ferskt (eða frosið) og skorið í bita
1 -2 msk saxað jalepeno úr dós
ferskt kóríander
ristað kókosmjöl (ég notaði kókosflögur því þær eru svo stórar og girnilegar en sleppti því að rista)

Steikja kjötbitana í smá olíu og leggið til hliðar. Steikið svo saxaðan laukinn uppúr smá olíu þartil mýkist og bætið við hvítlauknum, engiferinum og kóríanderduftinu. Kókosmjólkinni hellt útí og leyft að hitna aðeins. Svo á að setja í matvinnslusvél og mixa maukið slétt. Ég skellti náttlega bara töfrasprotanum oní pottinn ;)
Síðan er kjúklingurinn settur útí maukið og látið malla smástund. Ég leyfði þessu að malla í alveg hálftíma bara afþví ég hafði nægan tíma en ætli það sé ekki nóg að hafa það rétt nægilega lengi svo kjúklingabitarnir séu fulleldaðir (15 min). Salta og pipra. Í blálokin bætti ég við ferskum kóríander, mangóbitunum og jalepenoinu. Athugið ! Ef maður er að gera fyrir börn er náttlega best að setja jalepeno útí EFTIR að maður er búin að taka frá barnaskammtana... að öllu öðru leyti er þetta ekkert sterkt.

Bar fram á disk með hráhrísgrjónum (brúnum hrísgrjónum) og drussaði yfir kókosflögunum/mjölinu.

Kornfleksfiskur með ágætlega hollri remúlaðisósu

2009-01-20T09:43:00.000-08:00

Gerði bestasta steikta fisk í heimi núna áðan. Hef veigrað mér við að steikja fisk hérna í Svíþjóð vegna þess að a) gæðin á fiski hér eru ekkert til að hrópa húrra yfir og b) ég átti ekki til almennilegt rasp... þetta ofurbragðbætta í bláu pökkunum er bara til á Íslandi nefnilega.

En nú varð breyting á. Á nefnilega ágætis skammt af frystri íslenskri ýsu sem mamma ferjaði með sér í ferðatöskunni síðastliðið haust. Og svo rakst ég á skemmtilega uppskrift í gömlu Mama blaði þar sem bara er notast við mulið kornfleks til að velta fiskinum uppúr. Bráðsniðugt, auðvelt og sjúklega gott. Tala nú ekki um "hollu" remúlaðisósuna sem inniheldur bæði epli og súrar gúrkur ;)

Mig rámar í að hafa rekist á mjög svo svipaða uppskrift hjá Halldóru en þá var fiskurinn ofnbakaður og einhvað meira með kornfleksinu.... hún kannski kann betur skil á því. Ég eldaði eftir hennar leiðbeiningum fyrir langalöngu síðan en týndi svo uppskriftinni. Halldóra, ef þú lest þetta kommenteraðu þá endilega til að hafa smá viðmiðun og aðra útfærslu !

Kornfleksfiskur

Ýsa eða annar hvítur fiskur, magn sem mettir fjölda kvöldmatargesta

1 egg, hrært

kornfleks, mulið með höndunum

salt og pipar

smjör

Allir ættu nú að kunna aðferðina; velta fiskbitunum fyrst uppúr eggjahrærunni og svo uppúr kornfleksinu svo komi hjúpur á fiskinn. Salta og pipra og steikja uppúr smjöri. Ég var með frekar þykk stykki svo ég leyfði þeim aðeins að fullsteikjast inní ofn við 200 gráður, cirka 10-15 mín.

Remúlaðisósan;

1 dl léttmæjónes

1 dl sýrður rjómi, skyr, hrein jógúrt eða hvað sem er til í ísskápnum. Sjálf notaði ég tyrkneska jógúrt sem er hvít og þykk hrein jógúrt.

3/4 dl af hakkaðri súrri gúrku

1/2 rautt epli, skorið í litla bita (mér fannst reyndar að það hefði mátt vera meira epli)

salt og pipar

Öllu blandað saman og leyft að standa aðeins inní ísskáp til að "ná áttum" ;)

Gulrótarsúpa með stælum

2009-01-13T08:51:00.000-08:00

Það er að mallast gulrótarsúpa í pottinum hjá mér.... skemmtileg uppskrift sem ég rakst á í nýjasta eintaki LagaLätt og bara varð að prófa. Fyrir utan það að hún er sprengfull af vítamínum koma þarna við sögu lime, cummin, engifer, kókosmjólk og sítrónugras !
Ef öllu er sleppt ef þetta samt góð basic gulrótarsúpuuppskrift en fyrir þá sem óhræddir eru má fara alla leið ;)

Gulrótarsúpa

1 laukur, saxaður
smá olía
800 g gulrætur, skornar í hæfilega litla bita og jafnvel skrældar ef hýðið er ljótt
1 líter vatn með kjúklingakrafti
2 þurrkuð limeblöð (til í poka frá Blue Dragon og heitir "kafir Lime leaves")
1 sítrónugras sem búið er að banka á til að leysa úr læðingi bragðið (þetta er svona harður stilkur, já eiginlega bara í útliti einsog lítið prik... má alveg sleppa)
smá salt
1 dós léttkókosmjólk

Laukurinn saxaður og mýktur uppúr heitri olíu í pottinum. Gulrótum, sítrónugrasi og limeblöðum bætt við og vatn með krafti hellt í. Leyft að sjóða þartil gulræturnar eru mjúkar. Saltað. Limeblöðin og sítrónugrasið veitt uppúr. Súpan mixuð með töfrasprota eða í matvinnsluvél. Kókosmjólkinni bætt við og leyft að hitna vel í gegn.

Og svo lokatilþrifin;
2 dl tyrknesk jógúrt (bragðlaus þétt jógúrt... svipuð og skyr eða Óskajógúrt)
1 tsk cummin
1 msk olía
salt og pipar
Öllu blandað saman og leyft að standa inní ískáp smástund.

Súpan er svo sett saman á eftirfarandi hátt;
Í botninn á súpuskál er sett strimlur af niðursoðnum engifer (fæst í glerkrukku.. má sleppa) og jafnvel smá kóríander. Súpunni hellt í skálina og smá sletta af cumminjógúrt ofaná.

Grafinn lax með einiberja, trönuberja og ginkryddblöndu

2008-12-20T10:41:00.001-08:00

Í fyrra gróf ég eigin lax sem við höfðum svo í forrétt á gamlárskvöld. Ákvað að gera slíkt hið sama þetta árið og eftir að hafa skoðað ýmsar kryddblöndutillögur ákvað ég að halda mig við þá sömu og í fyrra... enda var það alveg rosalega gott ;)

Í kryddblönduleitinni minni sá ég ferlega fínt myndband á tasteline.com sem sýnir handtökin við að grafa lax. Sjá hér. Margar uppskriftir mæla með því að maður frysti laxinn áður en hann er grafinn en ég nota trixið hennar Bergljótar ömmu minnar og frysti hann eftir grafningu, tek hann svo úr frysti sama dag/kvöld og ég ætla að bera hann fram svo að hann sé hálffrosinn þegar ég sker hann. Þá er miklu auðveldara að skera í næfurþunnar sneiðar og ef hann er ennþá frosin þegar maður sker þá þiðnar hann á nokkrum mínútum þarna í sneiðum á fatinu. Að frysta er algjört lykilatriði til að fá í burtu allar mögulegar salmonellur og skemmtileghet...

Svo já. Aðferðin er þessi;
Tekur heilt laxaflak og skerð í tvo jafn stóra hluta. Blandar saman
4 msk sykur
2 msk salt
2 tsk þurrkuð einiber, barin í morteli
2 tsk þurrkaður rósarpipar, barin í morteli

og berð ofaná báða laxabitana. Svo er 1-2 cl gini dreypt yfir.
Núna set ég plastfilmu ofaní fat sem annar laxbitinn passar ofaní. Einn laxbiti er settur þarna í með hreistrið niðurávið, klippa svo góðri lúkufylli af dilli ofaná og dreifa yfir 1 dl af trönuberjum. Hinn laxabitinn er svo settur ofaná svo myndi einskonar samloku (hreistrið uppávið semsagt).
Öllu pakkað inní plast og farg sett ofaná. Látið standa í kæli í 1-2 daga og svo fryst þartil á að notast.

Smákökur með trönuberjum og hvítum súkkulaðibitum

2008-12-19T04:43:00.000-08:00

Ég á sérstakan jólauppskriftakassa fullan af jólamatreiðslublöðum og bókum. Þangað fer sko nýjasta uppskriftabók Nigellu Lawson "Nigella Christmas" þegar jólin eru búin og bíður eftir mér til næsta árs ;)
Prófaði smákökuuppskrift úr bókinni og verð að segja að hún kom mér á óvart. Kannski var það afþví ég var nýbúin að baka (og smakka) íslenska smákökuuppskrift sem var svo dísæt að mér leið einsog ég væri að bryðja bragðbættan sykurmola. Svo þegar koma að frú Nigellu minnkaði ég sjálfkrafa sykurmagnið með prýðis árangri. Ég hef nefnilega komist að því að ég er ekkert rosalega mikið fyrir súkkulaðibakstur eða dísætar kökur. Frekar ávexti og haframjöl !
Þessi smákökuupskrift inniheldur bæði.

Smákökur með trönuberjum og hvítum súkkulaðibitum
(eiga að gefa 30 stykki)

150 g hveiti
1/2 tsk "baking powder" / bakpulver / örlítið minna ef notað er lyftiduft
1/2 tsk salt
75 g haframjöl
125 mjúkt smjör
75 g púðursykur eða dökkur muscavadosykur, ég minnkaði magnið niður í 60 g
100 g sykur, aftur minnkaði ég magnið niður í 85 g
1 egg
1 tsk vanilludropar
75 g þurrkuð trönuber
50 g pecan hnetur, saxaðar
150 g hvítir súkkulaðidropar eða "chips". Fann hvergi svoleiðis svo ég keypti hvítt blokksúkkulaði og saxaði það.

Hita ofninn í 180 gráður. Mæla í skál hveiti, bakpulver, salt og haframjöli.
Þeyta saman í hrærivél smjöri og sykri (bæði púðursykri og venjulega) og bæta svo við egginu. Hræra svo saman við hveiti/haframjölsblöndunni. Hnoða svo saman við trönuberjunum, hnetunum og súkkulaðinu.
Svo er að bretta upp ermarnar ! Taka litla lúkufylli af deigi og rúlla í kúlu. Hversu stóra fer eftir því hversu stórar kökur þú ert að skjóta á að fá. Ég gerði golfkúlustærð. Setja á bökunarpappírsklædda ofnplötu og þrýsta svo aðeins niður þannig að kúlan fletjist örlítið út. Baka í heitum ofninum í cirka 15 mín. Leyfa að kólna áður en tekið er af plötunni.

Þessar má baka og frysta í allt að 3 mánuði. Þíða þá við stofuhita. Geymast annars í 5-7 daga í lokuðu íláti.

Árangur jólagjafadútls ársins

2008-12-12T08:21:00.000-08:00

Gaf mér tíma í dag til að stússast aðeins í konfekt- og kassagerðinni sem ég var búin að tala svo mikið um (sjá áður birta færslu hér).

Árangurinn var stórkostlega, unaðslega fallegur... já og góður líka. Uppskriftin var ekki fyrir 12 döðlur einsog hún Leila hafði gefið til kynna heldur endaði ég með 25 stykki þegar upp var staðið. Ekkert verra enda er þetta alveg einstaklega gott !
Braut saman kassana á korteri og voila.... komin hin fínasta jólagjöf sem verður færð gestgjöfum kvöldsins (við erum sko að fara í jólaboð á eftir).

GI-hakk og spakk með indverskum blæ

2008-12-03T13:00:00.000-08:00

Hvert heimili hefur sína eigin útgáfu af þjóðarréttinum hakk og spagettí. Sumir setja smá rjómaost útí, aðrir sveppi, rifnar gulrætur, tómatpuré... eða hreinlega bara tilbúna dósasósu útá nautahakkið.

GI-frelsaði sjálfa mig um daginn og héðan verður ekki snúið !

Hakk og spagettí með indverskum blæ.
f. 4

1 laukur, saxaður
3 hvítlauksrif, einnig söxuð

1 msk karrí
1 tsk engifer (duft, ekki ferskt)
möluð nellika á hnífsoddi
1 dl tómatpuré
1 dl vatn
400 g nautahakk

Hvítlaukur og laukur steikt uppúr örlítillri olíu. Bæta við hakkinu og öllum kryddunum. Salta og pipra. Vatninu helt útá pönnuna og látið malla í nokkrar mínútur.
Borið fram með heilhveitispagettíi (ofcourse!) og mangósósu sem ég geri úr sýrðum rjóma með smá mangóchutney. Ef maður ætlar að vera alveg agalega flottur á því má setja möndluflögur oná alveg í blálokin ;)

Úti á grænni grundu.... fiskur með ruccolapesto (GI)

2008-11-18T10:47:00.000-08:00

Ég fékk næstum því heimþrá til Íslands þegar ég sá litasprengjuna sem samanstóð af kríthvítri íslenskri ýsu þakinni heimagerðu ruccolapestói. Fór að kyrja ættjarðarlög og hljóp svo og náði í myndavélina til að festa augnablikið á (digital) filmu.

Eftir veruna í ofninum tapaðist nátturulega aðeins af þessum skærgræna lit en var nú samt alveg óheyrilega fallegt á diskinum með baunasalatinu. Feikna hollt og feykilega gott.

Hvítur fiskur með heimalöguðu ruccolapestó

600 g hvítur fiskur að eigin vali. Ég notaði íslenska ýsu sem ég átti í frystinum... mmm

50 g ruccolasalat
50 g furuhnetur, brúnaðar á heitri, þurru pönnu
1 dl parmesanostur
3 msk olía
Þessu er mixað saman í matvinnsluvél eða með töfrasprota þartil orðið að fallegu skærgrænu mauki.

Fiskurinn er lagður í ofnskúffu/fat, saltaður, pipraður og pestóinu smurt ofaná. Eldaður í 200 gráðu heitum ofni í 15-20 mín.

Bar þetta fram með baunasalati (GI-style) sem samanstóð af (ath! magnið miðast við salat fyrir einn); 1 lítil dós stórar hvítar baunir, hálfu avocadoi, smá niðurskornum rauðlauk og slettu af hvítvínsediki, olíu og salti+pipar.

Jólagjöfin (og jólaföndrið) í ár...

2008-11-08T11:45:00.000-08:00

Heimagert konfekt í heimagerðri öskju !

Gerist það betra ?

Í fyrra gerði ég æðislega góða sultu sem sló nátturulega í gegn hjá þeim sem voru nógu heppin að fá svoleiðis í jólagjöf frá mér... en þetta árið langar mig að dútla aðeins meira. Og þá meina ég töluvert mikið meira. Ekki nóg með að ég ætli að búa til smá konfekt heldur ætla ég líka að brjóta saman gjafaöskju fyrir hvern og einn.

Myndin er úr Elle Mat och Vin og ég ætla að gera tvær týpur sem þar er að sjá. Innihaldslýsing og uppskrift er hér. Svo er ég líka pínu heit fyrir að gera svona fylltar konfektdöðlur líka... sjá hér.

Ég er búin að sitja og æfa mig í að búa til öskjurnar. Það er alveg ferlega auðvelt ef maður bara er með réttan pappír og góða reglustiku til að fá öll brotin fín. Brotalýsingin er hér.

Pasta með perum og gráðosti

2008-09-21T09:40:00.000-07:00

Fljótlegasta pasta í heimi. Og alls ekkert óhollt heldur því það þarf lítið magn af gráðosti og beikoni til að gefa mikið mikið bragð.

Pasta með perum og gráðosti
f. 2-3

Heilhveitipasta, áætlið magn fyrir fjöldann
1 pera, skorin í eins þunnar sneiðar og hægt er
lófafylli af valhnetum, grófsaxað
1 pakki af beikoni, steikt þartil stökkt, látið kólna aðeins á eldhúspappír (dregur líka í sig fituna) og grófsaxað
100 g gráðostur að eigin vali

Ég sauð pastað, hellti af því og bætti ostinum við oní pottinn. Hrært þartil osturinn hafði bráðnað og skammtaði svo á diskana. Stráði svo restinni af innihaldinu ofaná hvern disk; fyrst beikoni, svo perubitunum og loks valhnetunum.

Ætifífilssúpa með sítrónurækjum og rauðlauksbrauði

2008-09-21T09:31:00.000-07:00

Ok... þessi súpa hljómar MUN girnilegri á sænsku; jordärtskocksoppa. Ég hafði ekki hugmynd um hvað jordärtskocka héti á íslensku, né heldur ensku svo ég bara googlaði því. Upp kom þessi síða hjá gestgjafanum.
Sumsagt Jordärtskocka = ætifífill = jerusalem artichoke.
Minnir á hnýðótta ljósa kartöflu í útliti en er ekki jafn mjölkennd á bragðið.

Þessi uppskrift er GI-skotheld en með brauðbollunum fer það dáldið forgörðum. En maður getur svosem sleppt þeim eða bara fengið sér pínusmá... því þær eru svo góðar að það má varla sleppa þeim ;)
Ég varð eiginlega mest hissa á því hvað rækjurnar féllu vel við bragðið á súpunni. Eiginlega dáldil sparisúpa (enda sunnudagur í dag og engin steik á þessu heimili) og ég á ekki eftir að hika við að bjóða gestum uppá þessa útgáfu einhverntíman fljótlega.

Ætifíflasúpa með sítrónurækjum
(uppskriftin segir fyrir 4 en við vorum 2 fullorðnir + barn og átum upp til agna... potturinn var sleiktur)

2 hvítlauksrif, þunnt sneidd
1 msk olía
5 dl vatn (ég bætti smá grænmetiskrafti við, á svo gott "lantbuljong")
600 g skrældir ætifíflar, skornir í helminga
salt
1 dl matreiðslurjómi
1 msk hvítvínsedik
Hvítlauksrifin mýkt uppúr olíunni, smávegis af vatninu bætt við og að lokum ætifífilsbitarnir. Restinni af vatninu bætt við en það á rétt að ná að þekja ætifífilsbitana í pottinum. Leyft að malla í 15 mín eða þartil orðnir vel mjúkir. Saltað örlítið og mixað með handmixara (eða sett í matvinnsluvél).
Rjómanum og edikinu bætt við og leyft að hitna aftur.

200 g rækjur
Safinn af einni sítrónu
2 msk olía (gjarnan olívuolía)
Rækjunum leyft að liggja aðeins í sítrónusafanum + olíunni. Ég saltaði örlítið. Bætt við í hvern súpudisk rétt áður en borið er fram og piprað.

Rauðlauksbrauðbollur
10 bollur (ég minnkaði uppskriftina um helming og gerði bara 5 sem nægði alveg fyrir okkur.. en hér kemur heil uppskrift)

4,5 dl hveiti
2 tsk "bakpulver" (svipað og lyftiduft)
1/2 tsk salt
50 g smjör
2 rauðlaukar, skornir í strimla
100 g rifinn, fitulítill ostur
Upprunalega uppskriftin segir að hér eigi að vera líka 1 dl olívur en ég átti engar svo ég sleppti þeim og jók við ostamagnið
2 dl mjólk

Ofninn hitaður í 250 gráður. Þurrefnunum blandað saman og smjörið skorið í bita, bætt við og mulið með fingrunum. Lauknum, ostinum og mjólkinni blandað við. Sett á bökunarpappírsklædda ofngrind. Búnar til 10 bollur sem eru cirka 5 cm að breidd. Bakað í 10 mín.

GI - Indverskur kjúklingaréttur

2008-09-12T11:54:00.000-07:00

Uppgötvaði í dag hversu brjálæðislega mikill munur væri á dósasósu og svo karrísósu frá grunni. Sérstaklega þessari GI-útgáfu sem er með fullt fullt af grænmeti í. Bragðmeira einhvernvegin og tekur alls ekki svo langan tíma að gera...
Bar að sjálfsögðu fram með hráhrísgrjónum og salati sem innihélt saxað hvítkál og papaya. Smá tyrknesk jógúrt setti punktinn yfir i-ið (sjá mynd).

Indverskur kjúklingaréttur

1 laukur, saxaður
400 g kjúklingabringur (tvær), skornar í bita
2 tsk karríduft
2 dl hafrarjómi (eða bara matreiðslurjómi)
2 rauðar papríkur
1 rautt chillí
1/2 blómkálshaus

Kjúllinn brúnaður á pönnu eða í potti uppúr smá olíu, lauknum bætt við og mýktur aðeins. Karríduftinu og rjómanum bætt við og leyft að malla smá við lágan hita. Papríkurnar saxaðar, chillíið snyrt fræhreinsað og saxað. Þessu bætt við í pottinn. Blómkálið er skorið í litla vendi og soðið í vatni þartil orðið aðeins mjúkt. Síðan bætt við í kjúklingapottinn. Öllu leyft að hitna í gegn.

GI - sallat með beikoni

2008-09-05T02:52:00.000-07:00

Áfram held ég að lista upp GI-mataræðinu. Í hádeginu í dag ætla ég að gæða mér á salati sem í er;
- steikt beikon
- 1 lítil dós "matvete" (svona hveitihafrar í dós)
- kirsuberjatómatar
- sykurbaunir, léttsoðnar
- blandað salat

og svo með því 10% Kesella (þeir kalla það ferskan ost, bragðast einsog sýrður rjómi) með fersku timjan og basil í.

GI - tvennskonar hversdagsspagettí

2008-09-04T09:11:00.000-07:00

Það var spagettíréttur á fyrsta degi GI-viknanna tveggja... og svo aftur í kvöld á þriðja degi. Bæði jafn ótrúlega gott og verður pottþétt sett í "gera aftur" möppuna mína.
Upprunalega uppskriftin mælir náttúrulega með að notað sé heilhveitipasta og núna eftir að hafa prófað bæði venjulegt og heilhveiti (svona til að gera vísindalegan samanburð) get ég sagt að þetta heilhveitis er sko engu verra ! Alls ekkert pappírsbragð einsog ég var búin að ákveða í huganum. Ingó lýsti því yfir að honum þætti það meira að segja betra svo hananú ! Heilhveitibær héðan eftir ;)

Pasta með rjómaskinkusósu/svindl-Carbonara (sjá mynd)
fyrir 4

Soðið spagettípasta (heilhveiti) sem nægir fyrir 4
1 gulur laukur, saxaður
olíusletta
2 dl hafrarjómi (hollara en venjulegur)
200 g reykt skinka í bitum (notaði sænskan kassler)
50 g parmesanostur, rifinn
2 egg
salt og pipar eftir smekk

Laukurinn hakkaður og léttsteiktur uppúr smá olíu í potti. Rjómanum bætt við og hitinn lækkaður í lægsta. Rífa parmesanostinn og bæta við eggjunum tveimur, hræra örlítið. Öllu blandað saman (best að gera það í pastapottinum eftir að búið er að hella vatninu af og taka af hellunni).

Pasta með zucchini, chevré og bresaola
fyrir 4

Hvernig getur pastaréttur ekki orðið guðdómlegur með þessu innihaldi ?
Soðið heilhveitispagettí fyrir fjóra.

1 zucchini (lítið), skorið í þunnar sneiðar og steikt á pönnu uppúr smá olíu þartil hefur tekið lit. Saltað, piprað og grófsaxað.

150 g chevréostur (geitarostur), mulinn
200 g bresaola (eða annað reykt álegg... hmmm... hvernig ætli fitulítið hangikjöt yrði í svona ?)

Ég lagði þannig uppá disk að ég setti fyrst bara soðið pastað, svo saxaða bresaolað, zucchiníið og ostinn að lokum. Þá getur hver og einn hrært í sínu eigin pasta svo osturinn smyrjist á pastað og verði að nammisósu.
Mestbest !

GI-menningin

2008-09-02T05:11:00.000-07:00

Ég hef farið á marga megrunarkúra yfir æfina og hef af því dregið einn mikilvægan lærdóm; öfgar eru ekki að gera sig.
Atkins-kúrinn hefur þess vegna aldrei heillað mig neitt sérstaklega né heldur það sem ég hélt að væri GI-mataræði. En svo tók ég mig til og fór að lesa aðeins meira um þetta GI-dæmi allt saman. Komst fljótlega að því að það eru til öfgar innan GI líka ! Common sence GI er hinsvegar einhvað sem ég hef nú þegar aðhyllst og bara vissi ekki fyrr en ég fékk það staðfest þarna í girnilegu GI kokkabókunum sem ég var að skoða.
Ég meina... afhverju að vera að fræða sig um hvað er mátt hátt eða lágt GI ef maður á svo bara að sleppa öllu kolvetni algjörlega ?! Nei frekar fannst mér vit í því að velja sér góð kolvetni og sleppa þeim vondu (hvítt brauð, hvít hrísgrjón, venjulegt pasta og kartöflur).

Hráhrísgrjón, quinoa, bulgur og dökkt brauð er nefnilega alveg my cup of tea ;) Heilhveitipasta er kannski meira svona ullabjakk en hver veit.. kannski mér takist að bliðka bragðlaukana til að skipta út góða góða eggjapastanu sem ég borða venjulega !
Brauðát vandi ég mig af um leið og ég flutti til Svíþjóðar og mér hálfbregður alltaf þegar við erum heima á Íslandi í fríum hvað eitt svona risabrauð er fljótt að fara þarna í Þverásnum.
Ætti ekki að vera of flókið !

Svo.
Ákvörðun hefur verið tekin. Ég ætla að reyna að halda mig við bókina "Klaras Goda GI-dagar" sem ég keypti loksins eftir að hafa reynt að handskrifa helming uppskriftanna úr lánsbókinni sem ég var með frá bókasafninu. Þar er tveggja vikna matseðill gefin upp með ótrúlega girnilegum réttum í hádegi og kvöldmat.
Alltaf gaman að prófa einhvað nýtt og hver veit nema ég fái einhvað útúr því kílóa og heilsusamlega séð líka ?!

Í dag er semsagt dagur nr. 1 og í hádeginu gerði ég mér salat úr;
- kjúkling (átti inní frysti eldaðan kjúkling sem ég hafði skorið niður og geymt til að hafa í salati)
- gúrkubita
- kirsuberjatómata
- sykurbaunir eða belgbaunir (sugar snap peas/sockerärtor), léttsoðnar
- rauðlauk
- stórar hvítar baunir úr dós
Hellti yfir þetta cirka 1 tsk af rauðvínsediki og 1 msk olíu. Gerði svo dressingu úr 1/2 dl Kesella og 2 msk 15% sýrðum rjóma, salt, pipar og litla lófafylli af fersku timjani.

Í kvöld verður svo pasta með skinku og léttrjómasósu. Skelli inn uppskriftinni af því á morgun ;)

Rauðbeðukaka.... BLEIK kaka !

2008-07-02T11:27:00.000-07:00

Já ást mín á rauðbeðum er hrein og tær. Held að það sé samblandan af þessum djúpa, skæra rauða lit og brjálæðislegrar hollustu.

Reif útúr sunnudags DN fyrir nokkrum vikum síðan breska uppskrift að Rauðbeðuköku. Fannst hún spennandi. Ekki varð það heldur verra þegar ég tók mig svo loks til að baka kökuna og degið varð SKÆRbleikt (sjá efri mynd). Eftir sinn tíma í ofninum var ennþá fallegur bleikrauður blær á henni. Og góð var hún líka !!

Rauðbeðukaka

250 g rauðbeða, hrá/fersk og rifin á grófu rifjárni

250 g smjör

sítrónubörkur, rifin, af cirka 1 sítrónu

250 sykur

2 egg

150 g þurrkaðir ávextir að eigin vali (trönuber, rúsínur, apríkósur.... ég blandaði þessu þrennu saman)

300 g hveiti

Smjörinu, sítrónuberkinum og sykrinum hrært vel saman þar til ljóst og mjúkt. Eggjunum bætt í, einu í einu. Rifnu rauðbeðunum og þurrkuðu ávöxtunum bætt við og hrært passlega mikið saman (með handafli), hveitinu að lokum. ATH !! Degið er fyrst dálítið einsog þurr pappamassi og ég hélt lengi vel að ég hefði mismælt hveitið. Hinsvegar láta rauðbeðurnar frá sér mikin safa þegar þær hitna í ofninum svo hætt er við að kakan verði hrá ef farið er nákvæmlega eftir uppskriftinni. Þar stóð nefnilega að það ætti að baka kökuna í 175 gráðu heitum ofni í 45 mínútur en ég hefði gjarnan viljað bæta að minnsta kosti 10 mín við þann tíma.

Gott með þeyttum rjóma, vanilluskyri eða "icing" (100 g flórsykur, sítrónusafi af 1 sítrónu, 3 msk þeytirjómi... flórsykur í skál, bæta við safanum og þeyta rjómann í smátt og smátt þartil verður að klístruðu kremi).

Fertugsafmælismatur fyrir fjölda manns

2008-06-30T11:44:00.000-07:00

Ingó varð fertugur í síðustu viku og við boðuðum að sjálfsögðu til grillveislu :) Ég hef aldrei eldað fyrir svona marga; sitjandi matarboð fyrir 20 fullorðna + börn ! Tókst alveg hrikalega vel og maturinn var lofaður í bak og fyrir.Það sem boðið var uppá:
BBQ-maríerað svínafillé
Mangó og svartbaunasalat
Gulrótarsalat
Svo voru nýsoðnar färskpotatis og þrennskonar kaldar sósur.
Í eftirrétt var vanillupannacotta með rabbabaracompott ofaná. Setti í lítil glær plastglös fyrir hvern og einn. Er með dáldið fetish fyrir svona individuall desert fyrir gesti ;)

Uppskriftirnar koma hér ! Allt magn gefið upp hér að neðan er fyrir 4 svo ég margfaldaði bara með 5....
BBQ marínering
fyrir cirka 1 filé
3 msk sojasósa
2 msk tómatsósa
1 msk hrásykur
1 msk rifin engifer
1 hvítlauksrif, pressað
smá pipar
Lagt í poka og látið marínerast í um það bil sólarhring.

Mangó og baunasallat
1 dós svartar baunir
1 þroskað mangó, skorið í bita (ég nota frosin mangó)
1/2 gúrka, skorin í bita
2 litlir vorlaukar

dressing:
2 msk ferskur limesafi
2 tsk sykur
1 tsk cummin duft
smá pipar og salt

1/2 msk sesamolía
1/3 krukka af ferskum kóríander (mér finnst mega sleppa því.... öðrum finnst það ómissandi)

Allt grænmetið skorið í bita og blandað saman við dressinguna. Sesamolíunni dripplað yfir og kóríanderinn saxaður og bætt við í lokin.

Gulrótarsallat
(bæði gott heitt eða kalt)
1,5 kg gulrætur
1 feitt hvítlauksrif
2 tsk heil cuminfræ, ristuð á þurri pönnu
1 tsk hunang
safi af 1 sítrónu
handfylli af rúsínum
handfylli af furuhnetum, ristuðum á þurri pönnu
2 msk olía
1 krukka kóríander

Gulræturnar soðnar heilar í smá söltu vatni þartil þær eru orðnar rétt tæplega fullsoðnar. Merjið hvítlauksrifið með örlitlu salti og bætið við cumminfræjunum. Merjið saman. Bæta við maukið hunangi og sítrónusafanum.
Hellið vatninu af gulrótunum og þegar þær eru orðnar nógu kaldar (en þó enn volgar) eru þær skornar í sneiðar og settar í skál ásamt dressingunni. Rúsínunum og furuhnetunum bætt við. Látið standa með loki á (eða filmuplastað) þartil á að borða. Ágætt ef salatið fær að standa í a.m.k. klukkustund til að draga í sig bragð af dressingunni.

Vanillupannacotta með rabbabarakompotti
4 dl rjómi
1/2 vanillustöng
1/2 dl sykur
2 gelatínblöð

Rjóminn settur í pott ásamt sykrinum. Vanillustöngin opnuð og fræin skröpuð út. Bæði fræ og stöngin sett í pottinn með rjómanum og suðunni leyft að koma snögglega upp.
Gelatínblöðin lögð í kalt vatn í 5 mín, tekin uppúr og vatnið kreist út og bætt svo út í heitt (en ekki sjóðandi heitt) rjómablandið.
Sett í lítil glös og geymd í kæli þartil farin að stífna.

300 g rabbabari
1 msk vatn
3/4 dl sykur
1/2 gelatínblað
Rabbabarinn skorin í centimeterþykkar sneiðar og sett í pott ásamt vatninu og sykrinum. Leyft að malla þartil rabbabarinn er orðin vel mjúkur. Leyft að kólna örlítið. Gelatínið lagt í bleyti í köldu vatni í 5 mín, tekið uppúr og kreist og bætt svo út í rabbabaramaukið.
Þessu er svo bætt ofan á stífa pannacottuna og leyft að stífna enn frekar.

Rauðbeðusalat með beikon, epli ofl.

2008-04-29T11:34:00.000-07:00

Ég hef oft lýst yfir ástríðu minni á rauðbeðum. Finnst þær bara sjúklega góðar hvort sem þær eru niðursoðnar í dós eða ferskar.
Við borðuðum úti á svölum í fyrsta sinn á þessu ári í kvöld. Yndislegt að sitja þarna með hvort sitt matarmikið salatið (sá stutti fékk bara pasta í staðinn) og hvítvínsglas, fylgjast með sólinni hníga bakvið ystu trén í bakgarðinum... algjör slökun !

Rauðbeðusalat með beikoni
(þetta magn dugði fyrir okkur tvö)

1 poki babyspínat
4 rauðbeður, soðnar svipað lengi og kartöflur, kældar, skrældar og skornar í bita
1 pakki beikon, steikt á pönnu og skorið í bita
1 dl furuhnetur, þurrsteiktar á pönnu
1 dl rifinn ostur (uppskriftin sem ég staðfærði þetta frá bað um Västerbottenost en ég notaði bara annan bragðsterkan ost)
1 lítið epli, afhýtt og skorið í bita
1 lítill rauðlaukur, skorin í mjóar ræmur

Lagði allt uppá fat og bar fram með balsamicoediki.

Svínakótilettur í basillikusósu

2008-04-05T09:45:00.000-07:00

Ókei... þetta er kannski dáldið svona "creamy" heimilismatur en fersku tómatarnir og basilíkan gerðu þetta allt saman voða frísklegt og gott.

Svínakótilettur í basillíkusósu

4 beinlausar svínakótilettur
Steiktar á pönnu uppúr smá smjöri, teknar uppúr pönnunni og geymt meðan sósan er gerð.
2 hvítlauksrif, kramin
Örlitlu meira smjöri bætt á pönnuna og hvítlaukurinn mýktur smástund á pönnunni áður en restinni er bætt við;
1 dl vatn
2 msk fljótandi kjötkraftur
2 dl sýrður rjómi (ég notaði 15%)
handfylli eða eftir smekk af ferskri (eða frosinni) basillíku
Sósunni á pönnunni leyft að sjóða aðeins og kótiletturnar síðan lagðar á pönnuna aftur. Steikt/soðið uppúr sósunni í 5 mínútur í viðbót.
2 tómatar, skornir í litla bita
1 dl rifinn ostur
Dreift yfir kjötið á pönnunni og leyft að hitna aðeins eða þartil osturinn fer að bráðna.
Bar fram með ofnkartöflubátum en hefði ábyggilega verið gott með hrísgrjónum líka.

Létt eplakaka með hindberjum

2008-02-25T09:25:00.000-08:00

Þegar ég segi létt þá meina ég að hún er bæði léttgerð (einnig kallað imbaheld;)) og létt=diet. Frekar lítill sykur og smjör í þessu miðað við útkomumagn en þó alveg óhemjugóð. Maður getur bætt sér upp hitaeiningatapið með því að bera hana heita fram með vanilluís, þeyttum rjóma eða hinni sérsænsku vanillusósu.

Eplakaka með hindberjum
(úr "ViktVäktarna, Matnyttigt!")

3 3/4 dl hveiti með bakpulver eða lyftidufti í (ég notaði teskeið af hvoru til að vera viss!)
1 fingurklípa af salti
150 g smjör
3/4 dl sykur
225 g epli, skræld og skorin í litla bita
2 egg, slegin
3 msk léttmjólk
225 g fersk eða frosin hindber (ég hálf afþíddi þau frosnu sem ég notaði, kom ekki að sök)
3/4 dl möndluflögur
flórsykur að dusta yfir

Hitið ofninn í 175 gráður. Setjið bökunarpappír í botninn á hringlaga formi.
Blandið saman hveiti, salti og smjöri. Myljið með fingrunum þartil orðið að kornóttu deigi. Bætið svo við sykri, eggjum og mjólk. Hræra þartil allt samanblandað. Hrærið varlega saman við eplunum og meirihlutanum af hindberjunum (vaaaarlega því að hindberin kremjast ef farið er ógætilega, skemmir ekki bragðið en deigið verður ljósfjólublátt á litinn!).
Hellið deiginu í form og sléttið aðeins úr því. Hellið yfir afganginum af berjunum og möndluflögunum. Bakist í 60-75 mín eða þartil kakan hefur hefast og fengið fínan lit.
Taka úr forminu og dusta flórsykri yfir.

Tvennskonar tælenskar kjúklingasúpur

2008-02-25T09:15:00.000-08:00

Finnst asískur matur dáldið góður og þá sérstaklega sá tælenski. Svona sterkar og góðar kjúklingasúpur reka hvaða kvef sem er langt í burtu og þá sérstaklega sú fyrri sem inniheldur engifer. Sú seinni er svo dáldið matarmeiri afþví hún er með rísnúðlum í. Báðar þó léttar og góðar, gæti eiginlega ekki gert upp á milli þeirra !

Kjúklingasúpa I

2 kjúklingabringur skornar í strimla
10 sveppir, saxaðir
3 gulrætur, saxaðar
Þetta er steikt uppúr 2 tsk olíu, saltað og piprað.
5 dl vatn
2 msk kjúklingakraftur, þetta tvennt hitað að suðu og kjúklingnum og grænmetinu bætt út í og leyft að sjóða í 5 mín. Því næst er eftirfarandi bætt út í...
1 tsk engifer
1 rautt chillí, saxað
2 msk fiskisósa (Nam Pla)
1 dós léttkókosmjólk
safinn af 1 lime
1-2 tsk kóríander (eða ferskt kóríander að vild).
Leyft að sjóða aftur í 5-6 mín.

Kjúklingasúpa II
1 msk grænt currypaste (tælenskt)
2 miðlungsstórir gulir laukar, þunnt sneiddir
2 hvítlauksrif, pressuð
1 þurrkað limeblað (eða börkurinn af 1 lime)
1 líter vatn með kjúklingakrafti í
150 g kjúklingakjöt sem búið er að skera í strimla og steikja á pönnu
hnefafylli af rísnúðlum (ath að sumar tegundir þurfa að fá að liggja í bleyti í nokkrar mínútur áður en settar út í til suðu)
1 dl létt kókosmjólk
1 hnefafylli af ferskum kóriander
salt og pipar
Þykkbotna pottur er hitaður á hellu og currypeistið léttsteikt (30 sek), setja útí lauk, hvítlauk, limeblað og smávegis af kjúklingakraftinum. Leyft að sjóða í 5 mín eða þartil laukurinn er orðin mjúkur.
Leggið í kjúklingin, hellið við afganginum af kraftinum og leyfið suðunni að koma upp. Setjið svo núðlurnar út í og leyfið að sjóða í nokkrar mínútur (cirka þann tíma sem núðlurnar þurfa til að fullsjóðast). Takið pottinn af hellunni veiðið uppúr þurrkuðu limeblöðin (ef þau voru notuð) og bætið við kókosmjólkinni, kóríander og saltið og piprið að smekk.

Thailenskur lax með núðlum

2008-02-15T04:28:00.001-08:00

Fékk vinkonu og skólasystur (íslenska) í mat núna í vikunni. Hún er voða hrifin af lax svo ég ákvað að prófa eftirfarandi uppskrift sem var birt í DN einhverntíman... var rifinn úr og geymd þartil tækifæri gafst. Og það tækifæri gafst loksins þarna ;)
Var 30 mín að gera þetta, innifalið var spjall við gestinn og ein ferð niðrí þvottahús meðan vatnið fyrir núðlurnar færi að sjóða.
Lýgilega gott miðað við tíma og magn hráefnis !

Thailenskur lax með núðlum

Einn biti úr laxaflaki, stærð fer eftir fjölda gesta en við vorum þarna 2
1 tsk rautt curry paste (tælenskt)
Rifinn börkur af 1 lime
salt og pipar
Tók laxinn úr ísskápnum cirka 45 mín áður en það fór inn í ofn og bar á það þunnt lag af curry paste, saltaði og pipraði og reif svo yfir börkinn af 1 lime.
Lét þetta standa á borðinu meðan ofninn var að hitna og skellti því svo inn meðan ég var að steikja grænmetið með núðlunum. Var semsagt í cirka hálftíma við 175 gráður.

Eggjanúðlur, magn fer eftir fjölda, í upprunalegu uppskriftinni var ætlast til að maður notaði glernúðlur en ég er hrifnari af eggjanúðlunum svo ég nota þær.... Soðnar (matreiddar) skv. leiðbeiningum á pakkanum.
1-2 rauðar papríkur skornar í bita
2-3 vorlaukar/salatslaukar, sneiddir
Tvær hnefafyllir af frystu brokkolíi, afþýtt í örbylgjunni áður en notað
1,5 dl kókosmjólk
1 msk fiskisósa (Nam Pla)
safinn af liminu
Byrjaði á því að steikja papríkurnar á heitri pönnu með smá olíu í, bætti svo við vorlauknum og að lokum brokkolíinu. Steikti með hraði þartil allt fór að mýkjast örlítið. Bætti þá útí kókosmjólkinni og fiskisósunni og skellti tilbúnum eggjanúðlunum útá. Smakkaði til með limesafanum og leyfði öllu að hitna vel í gegn.

Svínasneiðar með engifer.... og appelsínuquinoasallati

2008-02-09T11:50:00.000-08:00

Ég er áskrifandi að DN og það er fastur liður hjá mér að kíkja fyrst á öftustu blaðsíðuna því þar er "uppskrift dagsins". Hef ósjaldan prófað það sem þar er birt og það bregst næstum aldrei. Góður hversdagsmatur.
Þessi réttur tók (grínlaust) 20 mín að gera svo það er næstum fljótlegra heldur en að panta pizzu. Og náttlega töluvert hollari ;) Svo skemmdi það ekki heldur fyrir að það var quinoasallat með svínasneiðunum ! Elska elska elska quinoa.

Svínasneiðar með asískum keim ásamt appelsínuquinoasallati
úr DN 28. jan 2008
4 svínakjötssneiðar (hér kallast þær karré, einskonar kótilettur)
2 tsk rifinn engifer
1 hvítlauksrif, kramið
1 msk sojasósa
1 msk vatn
Kjötsneiðarnar steiktar á pönnu þartil farnar að taka lit, saltaðar og pipraðar. Engiferinn og hvítlaukurinn blandaður saman og smurt ofan á hverja sneið á pönnunni. Hitinn lækkaður og 1 msk sojasósu hellt yfir kjötið ásamt 1 msk (eða meir ef maður vill meiri sósu) vatni. Lok sett á pönnuna og kjötinu leyft að fullsteikjast nokkrar mínútur í viðbót, ca 8 mín.
Kjötið tekið uppúr pönnnni og smá sósuþykkni bætt út í vökvann sem myndaðist. Þá er komin heimsins besta sósa til að hafa með þessu.

Appelsínuquinoasallat
2 dl quinoa, soðið skv. leiðbeiningum á pakka ásamt 1 kanilstöng eða 1 stjörnuanís sem svo er tekin uppúr eftir suðu. (Ef þið eigið rautt quinoa þá er það sjúklega flott á litinn og extra gaman að nota það í þetta sallat)
1/2 lítill rauðlaukur, skorin í þunnar sneiðar
1 appelsína, afhýdd og "filéuð" (bátarnir skornir úr appelsínunni án þess að hýðið komi með), passa uppá að safinn af appelsínunni sé geymdur, kreista það sem eftir verður þegar búið er að skera bátana burt)
Smá persilja og salt.
Öllu blandað saman og borið fram með svínakjötsneiðunum og smá sósu.

Tómatsúpa og hrað-hefaðar brauðbollur

2008-01-24T13:32:00.000-08:00

Fór í ICA um daginn að kaupa einhvað smáræði. Í grænmetistorginu var stór rúlluvagn hlaðin tilboðsvörum. Þar á meðal 1,5 kíló af plómutómötum á tíkall. Jáh... tíkalll (sænskar) !
Voru akkúrat vel þroskaðir og alveg tilvaldir í súpugerð.
Lagðist í rannsóknarvinnu og fann miljón og eina aðferð við að gera tómatsúpu. Letin rak mig frá því að gera súpur sem þurfti að hita, endurhita, sigta, sía og kæla svo aftur... átakið mitt og nýársheit rak mig frá því að gera rjómasúpu eða súpu með massamikið af eggjarauðum (a´la Jamie Oliver elskulegur) svo ég endaði á því einfaldasta. Og mikið svaðalega var hún góð ! Engu síðri daginn eftir heldur og skammturinn varð svo passlega stór að ég náði meira að segja að frysta einn skálarskammt.

Einfaldasta tómatsúpa í heimi
fyrir guðmávita hvað marga
1 laukur
2 hvítlauksrif - olía hituð í potti og laukunum leyft að svitna í nokkrar mínútur.
1,5 kíló af gróft söxuðum plómutómötum bætt útí og leyft að malla cirka 35 mínútur
Mixað með töfrasprota þartil orðið að sléttu súpumauki.
Kryddað að vild, ég setti vel af salti, pipar og ogguskonsu grænmetiskrafti.
Bar fram í djúpum skálum og setti smá lófafylli af rifnum osti út í hverja skál.

Hraðhefuðu brauðbollurnar voru svo algjört delish með. Líka svo sætar í muffinsformum ;) ATH ! brauðið festist dáldið við muffinsformin, sérstaklega nýbökuð en það á alveg að vera hægt að setja deigið í vel smurt og brauðmylsnuþakin muffinsformabakkann (eiga ekki örugglega allir svona muffinsformaplötu, með 12 muffinsgötum í? *heheh*).

Hraðhefaðar brauðbollur (úr DN jan/2008)
12 stykki

50 g lifandi ger eða þurrger því að jafnaði
2 dl mjólk
2 msk olía eða brætt smjör
1 tsk sykur
1 dl jógúrt (ég notaði þessa þykku tyrknesku, annars ætti AB mjólk eða álíka að duga)
1 egg
1,5 tsk salt
1 dl rúgmjöl eða annað gróft
6 dl hveiti
Ofn hitaður í 250 gráður.
Mjólkin velgd og hellt yfir gerið í deigskálinni. Öllu hinu bætt við, hveitinu síðast og látið vinnast í hrærivélinni í nokkrar mínútur á góðum hraða. Deigið verður mjög rennandi en það er í lagi... á að vera svo... Hellt í smurt og brauðmylsnuþakið muffinsform eða í muffinsform og leyft að hefast í 30-35 mín eða þartil tvöfalt í stærð. Sett inn í ofn og hann lækkaður niður í 200 gráður. Bakað í 15-20 mín.

Nýársfiskisúpa ("fiskisúpa kokksins")

2008-01-01T12:38:00.000-08:00

Eftir allt tilheyrandi og bráðnauðsynlega ofát stórhátíðarinnar fannst mér við hæfi að bjóða uppá fiskisúpu á nýársdag. Við átum nú barasta samt yfir okkur af henni ! Enda rjómi og fleiri góðir hlutir í henni sem núlluðu út hollustuna í fiskinum ;) En mikið rosalega var hún góð.... öll indversku-thailensku kryddin voru hreint yndisleg með góða íslenska fiskinum. Heiti því að prófa hana heima í Svíþjóð líka og gá hvort hún sé jafn góð með "útlenskum" fiski. Hrikalega þæginleg uppskrift til að gera fyrirfram, gerði súpuna sjálfa um morgunin og skellti svo bara fiskinum í korteri áður en við ætluðum að borða hana.

Fiskisúpa kokksins (örugglega birt í Fréttablaðinu, des 2007, hlekkur líka hér ef þú villt sjá uppskriftina í upprunalegri mynd og án minna kommenta)

(Fyrir 6-10)
Tekur 30 mínútur að undirbúa. Líka góð daginn eftir.
150 g lúða
150 g ýsa (ég tvöfaldaði magnið af fiskinum, bæði ýsu og lúðu)
150 g rækjur
150 g hörpudiskur (má sleppa og ég sleppti því)
Mikilvægt að setja rækjurnar í eftir að slökkt er á pottinum eða hafa aðeins 1-2 mínútur á gashellu.
3 hvítlauksrif
3-4 gulrætur sneiddar
1 stk. laukur, saxaður
1 rauð paprika, söxuð
1 græn paprika, söxuð
1 dós tómatpuré
1 dós niðursoðnir tómatar
2½ dl vatn (ég þurfti að auka allverulega vatnsmagnið en það gerði ég í lokin þegar ég sá hvað hún varð þykk, fer eftir smekk býst ég við)
1 teningur fiskikraftur
½ teningur hænsnakraftur
1 tsk. tandoori masala (fann ekki þetta krydd heldur bara krydd sem hét Tandoori)
¼ tsk. karrí
¼ tsk. hvítur pipar
6 sólþurrkaðir tómatar sneiddir
4 msk. mango chutney
1 dl sæt chilisósa
500 ml matreiðslurjómi
Byrja á að hita eina matskeið af olíu í pottinum og brúna þrjú hvítlauksrif sem búið er að merja með hnífsblaði og skera niður. Tekið af hitanum og sett í skál. Brúna síðan í sama potti gulræturnar, laukinn og paprikurnar í tveimur matskeiðum af olíu. Þá er bætt í tómatpuré, niðursoðnu tómötunum, vatni, fiskikrafti, hænsnakrafti, tandoori masala, karríi og hvítum pipar. Nú strax á eftir eru sólþurrkuðu tómatarnir sneiddir niður og mango chutney, sætu chilisósunni og matreiðslurjómanum bætt við. Möluðum svörtum pipar bætt við eftir smekk og látið sjóða niður í um það bil fimmtán mínútur. Þá er slökkt undir pottinum. Þegar borðhaldið fer að nálgast er vermt undir pottinum og fiskurinn (allur nema skelfiskurinn) settur út í og beðið eftir suðunni. Gott að nota lúðu, ýsu eða búra. Skelfiskur eins og rækjur, hörpudiskur eða humar er settur út í þegar potturinn er tekinn af hellunni. Látið standa í fimm mínútur. Borið fram með nýju brauði. Smátt skorinni steinselju er sáldrað yfir.

Jólagjöfin frá mér í ár.... apríkósu og gulrótarmarmelaði með engifer og kanil

2007-12-12T12:41:00.000-08:00

Það skemmtilegasta sem ég veit (fyrir utan að horfa á sjónvarpið og borða góðan mat) er að gefa mat. Ætuhæfar gjafir (þýðing á ätbara gåvor) undanfarin ár hafa t.d. verið ýmiskonar sultur og svo hinar ómótstæðilegu súkkulaði biscotti sem ég hef núna týnt uppskriftinni að.
Gerði marmelaði í dag og mikið rosalega var það vel heppnað, þó ég segi sjálf frá ;), og mun barnapían mín og samstarfsfólk mitt fá þetta í jólagjöf frá mér. Lucky them. Alveg meinhollt líka því þetta er algjör vítamínsprengja (engifer + gulrætur!).

Apríkósu og gulrótarmarmelaði með engifer og kanil
(úr desemberútgáfu Coop uppskriftabæklingsins)

6,5 dl sykur
5 dl vatn
4 gulrætur (350 g) rifnar gróft á rifjárni
250 g þurrkaðar apríkósur, fínstrimlaðar (ég keyrði þær í matreiðsluvél til að fá þær grófsaxaðar frekar en fínstrimlaðar...)
2 kanilstangir
cirka 2 msk ferskur engifer, skorin í þunnar ræmur (sömuleiðis saxaði ég þetta frekar en fínstrimla, þ.e.a.s skar í örþunnar sneiðar og grófsaxaði svo)
0,5 dl Certo ávaxtapektín (græn skrýtin flaska af fljótandi pektíni)

Sjóða saman sykur og vatn í stórum potti þartil 1/3 av sykurvökvanum hefur soðið upp/saman. (ég mældi einfaldlega vökvann um leið og sykurinn hafði bráðnað vel í vatnið og mældi svo reglulega aftur og aftur þartil ég var sannfærð um að 1/3 hafði farið... við svona sultu og marmelaðigerð er alveg lykilatriði að vökvahlutfallið við bragðefnin, í þessu tilfelli gulræturnar og apríkósurnar, sé rétt miðað við uppskriftina).
Blanda svo við vökvann í pottinum apríkósurnar, gulræturnar og kanilinn og leyfa að sjóða í 10 mín. Hræra í pottinum af og til.
Hræra svo við þetta pektínið og leyfa því að sjóða 1 mín. Hræra kröftulega svo allt blandist vel saman og taka af hitanum. Setja strax í krukkur og lokið á. Geyma á köldum stað.

Smákökubaksturinn heldur áfram; Smákökur með Nóa lakkrískurli

2007-12-08T11:45:00.000-08:00

Það er sko ekki desember nema ég baki Rúsínuhaframjölskökurnar "mínar" og það gerði ég í dag. Prófaði líka smákökuuppskrift úr Nóasúkkulaðibæklingnum frá því 2006. Ansi mikið góðar líka. Afrakstur dagsins verður svo vonandi étin upp á jólaglöggi Íslendingafélagsins á morgun.
Eitt sem ég get ekki annað en mælt með þegar gera á smákökur er að setja á sig einnota plasthanska (til í Claes Olsson) og rúlla litlar kúlur úr deiginu eins og ef maður er að gera súkkulaðitrufflur og fletja svo út á bökunarpappírnum. Verða voða fallegar smákökur með þessari aðferð og maður er sko miklu fljótari að þessu heldur en ef notaðar eru teskeiðar til að föndra með ;)

Smákökur með Nóa lakkrískurli

500 g púðursykur
250 g lint smjörlíki (ég nota alltaf smjör)
2 egg
500 g hveiti
1 tsk matarsódi
1 tsk engifer
1 tsk negull
2 tsk kanill
70 g Nóa lakkrískurl (ég notaði töluvert meira... hehe)

Hrærið púðursykur og smjör(líki)vel saman. Bætið eggjunum út í, einu í senn, og hrærið vel á milli. Síðan er þurrefnum og lakkrískurlinu bætt út í og deigið sett á bökunarpappírsklædda plötu með teskeið (nú... eða með plasthönskum!). Það getur verið fallegt að þrýsta með gaffli ofan á hverja köku til að mynda mynstur. Bakið kökurnar í miðjum ofninum við 175 gráður í 7-8 mínútur.

Tvennskonar jóladesertar... þar af einn óvart !

2007-11-29T01:19:00.000-08:00

Bjó alveg óvart til überdüber jólalegan desert í gærkvöldi. Var að gera afrískan pottrétt (sem er ekki nógu ofurgóður til að ég birti uppskriftina hér) og sat uppi með 1/2 dós af létt kókosmjólk. Prófaði uppskrift sem ég hafði fengið á desertgerðarnámskeiði:

Kókospannacotta

2,5 dl rjómi
2 dl kókosmjólk (létt er í lagi)
35 g sykur
2 1/2 gelatínblað
Leggur gelatínblöðin í bleyti í köldu vatni. Setur rjóman, kókosmjólkina og sykurinn í pott og hitar við vægan hita þartil sykurinn hefur bráðnað. Tekur upp gelatínblöðin og kreistir úr þeim allan vökva. Lætur þau útí rjómakókosmjólkina og hrærir þartil allt er blandað saman. Hellir í skálar (fjöldi fer eftir hversu mikið hver og einn á að fá... ég hellti í 4 grunnar desertskálar og það passaði fínt) og setur í kæli í nokkrar klukkustundir eða þartil orðið stíft.
Svo kemur jólahlutinn:
ég afþíddi í örbylgjunni tvær góðar handfyllir af hindiberjum. Tók desertskálarnar með pannacottanu úr kæli og dýfði botninum á skálunum í heitt vatn. Þannig losnaði pannacottan frá skálinni og ég gat hvolft henni á stóran djúpan desertdisk. Ein handfylli af hindiberjum fór oní hvern disk og svo hellti ég afgangi af kirsuberjasósu (úr fernu) yfir.

Hina uppskriftina hef ég ekki prófað, enda sá ég hana bara í morgun í nýjasta Dagens Nyheter. En bara hugsunin um að borða þetta fær vatnið til að renna..... VERÐUR að prófa !

Piparkökuþeytingur með glöggmaríneruðu sítrussallati
(úr DN 29. nóvember 2007)
fyrir 6

10-15 piparkökur muldar
2,5 dl þeytirjómi.... já... þeyttur ;)
Blandað saman og geymt í kæli

4 appelsínur
2 blóðappelsínur
1 blóðgreip
1 dl hvítt glögg
4 nellikur
1 kanilstöng

Ávextinir skrældir og skornir í báta (filéaðir; skorið milli himnanna á ávextinum svo kjötið eitt verði eftir). Glöggin er hituð upp ásamt nellikunum og kanilstönginni. Hellt yfir ávextina og leyft að standa í minst 1 klst. Sítrussallatið er svo borið fram með piparkökurjómanum.
*sluuuuuurp*

Mangókjötbollur - hversdags

2007-11-26T09:17:00.000-08:00

Alltaf gott að grípa til þess að elda úr hakki svona hversdags. Ekki sakar nú ef úrkoman er fljótgerð, holl og alveg þrusugóð ! Svo er uppskriftin svo imbaheld að meira að segja elskulegur eiginmaður minn væri fær um að gera þetta án aðstoðar (hann fékk að fylgjast með og rúlla upp bollunum). Tók 20 mín að gera frá grunni !

Mangókjötbollur
(úr Allt om mat 4/2007)
f. 4 (en við vorum nú bara 2 + 1 og átum allt upp til agna)

500 g nautahakk
1 egg
2 msk mangó chutney
1/2 dl létt sýrður rjómi
1 tsk salt

Allt blandað saman og rúllað upp í cirka 20 litlar bollur. Sett í bökunarpappírsklædda ofnskúffu og eldað í 250 gráðu heitum ofni í 10-15 mínútur.
Gerð sósa úr:
2 dl létt sýrður rjómi/tyrknesk jógúrt
smá salt
2 msk (eða meir eftir smekk) mangó chutney

Borið fram með couscous og soðnu brysselkáli. Vil taka fram að brysselkálið var alveg sjúúúklega gott með þessu og átti alveg einstaklega vel við. Í upprunalegu uppskriftinni áttu einnig að vera 1 dl "sötmandel" (sætar möndlur?) en ég átti þær ekki til svo þeim var sleppt.

Eru jólin að nálgast ? Kaliforníudraumar og Trönuberjasmákökur

2007-11-18T09:53:00.001-08:00

Alvarlegt smákökuheilkenni að hrjá mig þessa dagana. Mig dreymir um að gera sjö sortir fyrir jólin og fer eflaust létt með það... vandamálið er bara.... hver á að éta þetta allt saman ?!
Var búin að vera að glugga í bækur og blöð, ætlaði að bíða með þetta frammá síðustu stundu svo ég væri nú ekki bakandi einsog brjáluð húsmóðir í heilan mánuð. En í dag sprakk ég. Gat ekki meir. Tvær sortir voru testaðar í kvöld með fínum árangri:

Kaliforníudraumar, 25 stk
(úr "Sju sorters kakor")

2,5 dl brun farin (brúnn strásykur, væri eflaust hægt að nota dökkan muscavado sykur), ég reyndar minnkaði sykurmagnið niður í 1,5 dl án þess að það kæmi að sök
1 msk maizenamjöl
1 fingurklípa salt
2 eggjahvítur (notaði 3 því eggin voru svo lítil)
2 dl hakkaðar hnetur að eigin vali (notaði Pecanhnetur og hakkaði í töfrastafnum)

Eggjahvíturnar stífþeyttar og sykrinum, saltinu og maizenamjölinu blandað varlega (snúið niður) við. Hneturnar blandaðar varlega við í lokin.
Litlar valhnetustórar klípur settar á smjörpappír með tveim teskeiðum og bakað í cirka korter í 150 gráðu heitum ofni.

Trönuberjakökur með hlynsírópi, 40 stk
(úr Gestgjafanum, 12. tbl. 2003)
125 g lint smjör
100 g sykur
3 msk hlynsíróp (notaði dökkt síróp)
1 tsk vanilludropar
2 egg
150 g hveiti
1/4 tsk matarsódi
60 g þurrkuð trönuber, grófbrytjuð

Ofninn hitaður í 190 gráður. Hræra smjörið í hrærivél og hella sykrinum saman við í mjórri bunu (veit ekki afhverju... þetta er nú bara strásykur ?!). Þeyta þartil blandan er létt og ljós. Þeyta þá hlynsírópi og vanilludropum við og loks eggjunum. Blanda saman hveiti og matarsóda og hræra saman við og blanda að lokum trönuberjunum við með sleikju. Setja á pappírsklæddar bökunarblötur með teskeið og hafa gott bil á milli. Bakið efst í ofninum í 10 mín eða þartil kökurnar hafa brúnast á jöðrunum.

Tvennskonar laxaábreiða

2007-10-31T08:51:00.001-07:00

Laxaábreiða kalla ég það sem er smurt ofaná laxinn áður en hann er svo ofnbakaður við 200 gráður í 12-15 mínútur. Gerir hann alltaf alveg ferlega bragðgóðan og djúsí.
Hef gert þessar uppskriftir núna undanfarnar tvær vikur og get eiginlega ekki valið uppá milli hver sé best... þær eru báðar algjört namminamm.

Feta-ábreiða
Fetaostur mulinn og blandaður með sýrðum rjóma (hlutföllin kanski 70/30) og smá ferskum basil. Breitt ofaná laxinn og bakað í ofni. Bar fram með basic risotto.

Sítrónu-pipar-ábreiða
30 g brætt smjör
7 msk fersk brauðmylsna (tek 2 brauðsneiðar og rista léttilega, mixa í handmixer þartil orðnar að mylsnu)
fínrifin sítrónbörkur af einni sítrónu
slatti (0,5 msk) pipar
Öllu blandað saman og breitt ofaná laxinn. Ég snöggsauð ferskan aspas (1 mín í söltu vatni) og setti undir laxinn áður en hann fór inn ofninn. Nýsoðnar kartöflur og sítrónusósa (frá Kelda) en hefði mátt vera Hollandaise sósa til að gera það skv. aspasreglunum ;)

Bláberjabollur... egg, smjör og olíulausar með hörfræjum

2007-10-14T09:36:00.000-07:00

Nú veit ég loks (þökk sé lesenda þessa bloggs) hvað blessuðu línfræjin heita á íslensku... sumsagt hörfræ ! Þarf víst að nýta þennan poka sem ég keypti um daginn fyrir hörfræjarbollurnar (sjá uppskrift neðan) áður en hann skemmist. Ég var frædd um það í dag að það sé erfitt að geyma hörfræin lengi því það komi af þeim leiðinlegt lýsisbragð eftir lengri geymslu. Þá er um að gera að baka meira með hörfræjum í og ég gladdist alveg dæmalaust mikið þegar ég sá þessa uppskrift í nýjasta tölublaði Amelíu. Uppskriftina í sínu sænska upprunalega formi má finna hér.
Mér þætti alveg svakalega gaman ef einhver á íslandi myndi nenna að gera þessa uppskrift og prófa að nota skyr með vanillubragði í staðinn fyrir vanillu Kesella einsog upprunalega uppskriftin gerir ráð fyrir..... það er svipuð áferð í skyri og Kesella nebblega.

Léttar bláberjabollur með HÖRfræjum
Rúmlega 20 stykki

50 g ger (ferskt eða þurrger í samsvarandi)
2,5 dl léttmjólk eða undanrenna
1 dl Kesella með vanilj... / Skyr með vanillubragði
1/2 dl fljótandi hunang
1 dl ljóst síróp
1 tsk kardimomma
1 tsk salt
1/2 dl hörfræ
8 dl hveiti

Mjólkin er velgd og Kesella/Skyri bætt við. Hellt yfir gerið sem hefur verið mulið í hrærivélaskálina, hrært varlega og gerinu leyft að leysast upp. Sírópi, hunangi og kryddi bætt við. Hörfræjunum og hveitinu hrært við smám saman þar til farið að sleppa skálinni. Leyft að hefast undir viskustykki (er það ekki annars bara það sem bakdukur er?) í 30 mín.
Hnoðað með smá hveiti á borði og flatt út í rétthyrnt stykki.
1/2 dl bláber ferskt eða afþídd frosin
1 dl Vanilj-Kesella/Skyr með vanillubragði
1/2 dl kanill
1/2 dl vanillusykur (tek fram að mér fannst þetta magn bara óhemju mikið og notaði ekki nema helmingin af hvoru).
Bláberin blönduð saman við Kesellað/Skyrið og smurt varlega í miðju deigsábreiðunnar. Kanil og vanillusykri dustað yfir. Rúllað upp á langhliðinni og skorið í cirka 20 bita. Sett á bökunarpappírsklædda (eða í svona bull-form) ofnplötu. Leyft að hefast aftur í 30 mín. Ofninn hitaður á meðan í 250 gráður.
Penslaðar með 1 eggi sem hefur verið hrært saman við cirka teskeið af vatni og örlitlu salti. Skreyttar með möndlum eða perlusykri.
Bakað í 8 mín, þær taka fljótt lit svo það er gott að fylgjast VEL með tímanum.

Klessukaka með perum

2007-10-07T11:26:00.000-07:00

Kladdkaka (klessukaka) er alveg klassísk sænsk kaka. Því klessulegri því betri, borðuð með rjóma eða vanillusósu. Algjör namminamm.
Sá uppskrift að þessari í sunnudagsblaði Dagens Nyheter og sá um leið að þessa yrði ég að prófa ! Varð ekki fyrir vonbrigðum, við sitjum hérna með fulla malla ;)

Klessukaka með kardimommuperum

4 meðalstórar eða 6 litlar perur af harðri gerð.
4 dl sætt vín (Madeira, sherrí, púrtvín eða jafnvel jólaglögg)
1,5 tsk steyttar kardimommur
(0,5 dl sykur ef vínið er ósætt)
Perurnar afhýddar en hafðar heilar. Settar í pott með víninu og kardimommunum og látið sjóða við hægan hita í 10 mínútur. Leyft að kólna í pottinum og síðan teknar upp úr og skorið til helmings. Kjarninn og það fjarlægt varlega úr og perurnar settar með skurðhliðina niður í kökuformið (best er að setja bökunarpappír í botninn fyrst).

200 g smjör, brætt
4 dl sykur (má gjarnan minka það magn um heilan dl)
4 egg
300 g hveiti
1 dl kakó
1 msk vanillusykur
örlítið salt
Eggjum og sykri blandað saman og því næst bætt við bráðnu smjörinu. Öllu hinu blandað saman í skál og að lokum eggjasykurssmjörblöndunni. Deiginu er smurt yfir perurnar og bakað við 200 gráður í 15 mínútur.
Kemur flott út að snúa kökunni "öfugt" á kökufatinu svo að perurnar sjáist.

Brauðbollur með línfræjum .... meinhollar og æði góðar

2007-09-19T01:11:00.000-07:00

Ég var allt í einu að átta mig á því að ég veit ekki hvað "linfrö" er á íslensku ! Línfræ ? Á ensku er það víst flaxseed en það færir mig nú engu nær ylhýra móðurmálinu.
Allavegana er þetta megafræ alveg meinhollt. Á að koma balans á magastarfsemina auk þess sem það inniheldur góða fitu einsog Omega-3.

Var að baka brauðbollur um daginn og þá fannst mér allar uppskriftir vera ansi mikið einsleitar. Bara mismunandi magn af allskyns hveititegundum, ger, vökvi, fita (smjör eða olía), sykur og salt. Ekki spennandi. Svo sami prósessinn með að hnoða, lyfta, móta, lyfta og baka. Árangurinn náttlega oftast alveg hreint ágætur og þá sérstaklega meðan brauðbollurnar eru heitar en verða svo óspennandi fljótlega uppúr því.
En svo.....
svo fann ég línfræjabrauðbollurnar sem heltóku hjarta mitt og mallagat. Bollurnar eru bara með góðum fitum (olíu og línfræjum) og algjörlega sykurlausar. Ég notaði staðlaða lyftingaraðferðina en uppskriftaeigendurnir/hönnuðurnir á Tasteline.com mæla líka með því að maður hnoði, láti lyftast í hálftíma, móti svo í brauðbollur og geymi inn í ísskáp yfir nótt. Láti hæglyftast þar. Svo er bara að baka að morgni dags meðan kaffið bruggast og voila ! :)

Línfræjabrauðbollur
12 stk
(af http://www.tasteline.com/)

3 dl mjólk, hituð þartil vel volg
1 msk olía
1 tsk salt
25 g ger
0,5 dl hveitiklíð (notaði reyndar einhverja aðra grófa korntegund með góðum árangri)
0,5 dl línfræ
7 dl hveiti

Þurrefnum blandað saman (nema kannski örlitlu hveiti sem er geymt til að minnka/auka eftir því hvernig deigið myndast í hrærivélinni) og olíunni og volgri/heitri mjólkinni hellt út í. Hnoðað þar til deigið er orðið tilbúið. Látið lyfta sér í a.m.k. hálftíma.
Þarf ekki að hnoða meira heldur er mótuð rúlla og skornar út 12 bollur. Þeim raðað á ofnskúffu með 1cm millibili svo þær myndi "brytbröd" eftir baksturinn. Þ.e. að þær festist rétt saman á hliðunum.
Aftur látnar hefast í a.m.k. hálftíma og svo penslaðar með mjólk. Bakast við 250 gráður í 15 mín.

Imbaheldar "kebabbollur"

2007-09-02T11:47:00.000-07:00

Sænsku klassísku kjötbollurnar eru vinsælar á þessu heimili. Hilmir étur á við tvo fullorðna. Bara brúnasósudæmið og kartöflumúsin sem gera blessuðu bollurnar frekar mikið boring. Ég var þess vegna frekar mikið fegin þegar ég rakst á þessa uppskrift í Good Food blaðinu.

Svo einfaldar og imbaheldar að það tekur því ekki að setja upp einsog alvör uppskrift ;)

1 lítill pakki tilbúnar kjötbollur

2 msk mulið cuminkrydd
1 msk mulið kóríanderkrydd
smekk magn af chillídufti (mér finnst sterkt gott!)

ferskt kóríander, saxað
rauðlaukur í "bátum"

Kjötbollurnar eru rúllaðar uppúr fyrst þurra kryddinu og svo ferska kóríanderinu. Þræddar uppá grillspjót ásamt rauðlauksbátum (á hvert spjót passar að setja 5-6 bollur og 2 rauðlauksbáta). Penslað með olíu og grillað, helst á útigrilli annars á grillpönnu eða ofni nokkrar mínútur.
Bollurnar, laukurinn og ferskt grænmeti að eigin vali er svo sett í heitt pítubrauð. Tzatsíki sósa passar perfect með þessu (grísk gúrkusósa), hægt að kaupa tilbúið útí búð.
15 mínútna matargerð í sínu besta !

Lax með mangósalsa....

2007-08-09T01:22:00.000-07:00

Smá óvenjulegt innlegg hjá mér því ég ætla ekki að skrifa upp (með eigin breytingum) uppskriftina heldur bara linka beint í hana á mbl.is !
Ástæðan er náttlega einföld, það þarf hvorki að þýða uppskriftina né staðfæra eins og ég geri oftast enda elda ég mest uppúr sænskum og enskum kokkabókum og blöðum.
Ég reyndar grillaði laxinn í staðinn fyrir að steikja enda finnst mér það auðveldara að skella bara í grillklemmuna og henda á grillið.
Til að auðvelda enn frekar notaði ég frosið mangó sem fæst hér í Svíaríki. Á alltaf poka inní frysti því mangóinn er misdýr og misþroskaður þegar maður ætlar að nota hann. Fyrir utan það að maður losnar við að baukast við ávöxtinn til að fá þetta litla kjöt sem á honum er.

Lax með mangósalsa og jógúrtsósu

Ástríðuávaxtatríffle

2007-08-09T01:06:00.000-07:00

Hef ekki áður prófað að nota ferska ástríðuávexti til matar(desert/köku)gerðar. Þessir ávextir eru ekki beint girnilegir heldur. Einsog uppþornað avókadó en inní leynist voða góður fræfylltur ávaxtakjötssafi.
Gerði umræddan desert strax eftir matinn og var ekki nema 10 mín að raða þessu saman. Geymist í ísskáp í 1 sólarhring svo þetta er alveg einhvað sem maður getur dundað sér við að gera áður en gestirnir koma og skella svo á borðið eftir matinn.

Ástríðuávaxtatríffle
staðfært uppúr Good Food blaði
fyrir 6

6 stk ástríðuávextir
safi úr 1 appelsínu

1 dolla mascarpone ostur (200-250g)
50 g sykur
1 tsk vanilluessence (eða bara vanilludropar)

2 dl rjómi, þeyttur
1 sandkaka/hvítur botn/"sockerkaka" keypt úr búð
3 ferskjur, skornar í báta

Ástríðuávaxtakjötinu og appelsínusafanum blandað saman.
Mascarponeostinum, sykrinum, og vanilluessencinu/dropunum hrært saman þartil slétt. Blandað léttilega (ekki hraðhræra!) saman við þeytta rjómann.
Kakan er skorin í bita og helmingnum af henni er raðað í botninn á djúpri skál. Ef skálin er glær er það ekki verra því þetta verður fallegt á að líta!
Ástríðu/appelsínusafinn er notaður til að bleyta aðeins uppí kökunni á botninum og ferskjubitum raðað yfir. Svo er helmingi af mascarponerjómablöndunni dreift yfir. Aftur sett lag af köku oná þetta, bleytt upp með safa, ferskjubitar og rjómablöndu. Oná er svo dreift ferskjubitum og afganginum af safanum.

Kjúklingasalat með borlottibaunum

2007-07-17T04:39:00.000-07:00

Klikkar ekki að hafa smá frískandi ávexti í matarmiklu salati. Eftirfarandi var étið með bestu lyst í gærkvöldi;

Kjúklingasalat með borlottibaunum
(úr Lagalätt)
4 kjúklingabringur, skornar í hæfilega stóra teninga og steiktir á pönnu ásamt smá hvítlauk (1-2 rif, kramin), rósmarín, salti og pipar.

1 Romainesalathaus, rifin í bita
1 rauðlaukur, þunnt sneiddur
2 avocado, skorin í teninga
2 dósir af tilbúnum, soðnum Borlottibaunum, skolaðar og látnar renna vel af
2 appelsínur "úrbeinaðar" (hýðið skorið utan af heillri appelsínu og bátarnir skornir úr hver fyrir sig), passa uppá að safna saman safanum í skál og kreista vel úr því sem eftir verður af appelsínunni þegar bátarnir hafa verið skornir úr.
Appelsínusafinn sem eftir verður er blandaður saman við 1-2 msk olíu, salt og pipar. Þetta er notað sem dressing á salatið og hellt yfir.

Sumarbústaðarkaka (barnvæn)

2007-05-10T09:38:00.000-07:00

Við Hilmir bökuðum saman um daginn. Hann fékk aaaalveg sjálfur að setja frosnu berin í kökuna. Mér fannst þessi algjör snilld og ætti að henta vel þegar maður hefur ekki öll eldhúsáhöldin sín einsog t.d. hrærivélina.

Sumbókaka
(stílfærð uppúr LagaLätt)

75 g smjör
2 dl sykur
2 dl hveiti
1 tsk lyftiduft eða bakpulver
1 tsk vanillusykur
2 egg
1 pakki frosin ber að eigin vali (upphaflega uppskriftin segir "hallon" en ég var með blöndu af því og "björnbär" og það kom vel út líka... held það meigi í raun setja hvaða ber sem er í þetta en frosin verða þau að vera)

Smjörið brætt í potti og látið kólna. Þurrefnum og eggjum bætt við útí pottinn og hrært saman. Deigið sett í hringlaga form (sem búið er að smyrja og hrista smá brauðmylsnu í). Frosnu berunum drussað frjálslega oní degið og sett í ofn, 175 gráðu heitan og bakað í 45 mín.
Má gjarnan bera fram með ís eða þeyttum rjóma....

UPDATE !
Fann aðra útgáfu af sömu laufléttu kökuuppskrift.... og sú er með rabbabara (nýjasta uppáhaldið mitt!).

Sama aðferð með að gera grunndegið;
100 gr smjör brætt í potti, látið kólna og svo bætt við ...
2 dl sykur
2 egg
2 dl hveiti
1 tsk bakpulver/lyftiduft

100 gr rabbabari er skorin í sneiðar og vellt uppúr/með 1 tsk kartöflumjöli.

Degið látið í form, rabbabarinn ofaná og rifinn 100gr möndlumassi þar ofaná. Bakað í ofni við 175 gráður í 20-30 mín.

Tómatakaka

2007-05-10T09:24:00.000-07:00

Þessi kaka fer víst einsog sinueldur um Bandaríkin núna.... þetta er svona "öðruvísi" kaka í ætt við gulrótarkökuna. Grænmeti í kökum er alltaf dáldið spes.

Tómatakaka
(úr Allt för föräldrar blaði)

100 g mjúkt smjör
2 1/2 dl púðursykur eða brun farin
3 egg
3 dl tómataMAUK/puré í dós (kallast "passata" á ítölsku tómatdósunum)
5 dl hveiti
1/2 msk bikarbonat
ponsulítið múskat, malið
ponsu malin nejlika
1 tsk malinn kanill
100 g valhnetur

Smyrjið hringlaga form með smjöri. Hrærið smjörið og sykurinn vel saman. Bætið við eggjunum einu og einu í einu. Tómatamaukinu er svo bætt við og loks þurrefnunum. Hakkið hneturnar gróflega og bætið við í deigið.
Hellt í formið og bakað í neðri hluta ofnsins við 175 gráður í 45-50 mín. Látið kólna alveg.
Í upphaflegu uppskriftinni átti maður að skera kökuna í tvennt og setja appelsínumarmelaði á milli en mér fannst það algjör óþarfi. Kakan festist ekki saman aftur með marmelaðinu einhvernvegin. Og munurinn á bragði var ekkert stórkostlegur. Hinvegar var kremið megagott.
Þegar hún hefur kólnað er sumsagt kreminu bætt ofaná.
Kremið samanstendur af;
300 g rjómaostur
1 dl appelsínumarmelaði.

Kjúklingabaka (hversdags)

2007-05-10T09:12:00.000-07:00

Endurvann þessa uppskrift frjálslega úr Good Food blaði (06/2005). Kom mér á óvart hvað það var fljótlegt að gera þetta og miðað við frekar fá hráefni varð þetta ofboðslega ljúffengt.

Kjúklingabaka

3 kjúklingafilé, skorin í hæfilega stóra bita (2 munnbitar hver biti cirka)

100 g frosið, blandað grænmeti. Ég notaði bland af mínígulrótum og harricot verts
100 g aspas. Þetta var líka frosið hjá mér. Góður frosni Findus aspasinn.
1 poki babyspínat

1 dl sýrður rjómi
1 pakki (80 g) proscuttio skinka, skorin í hæfilega bita (í þrennt nægir mér)
3 ferskar brauðsneiðar blitzaðar/muldar svo úr verði fersk brauðmylsna

Kjúllabitarnir eru settir í eldfast mót og kannski 1 msk af (fljótandi er best) smjöri dripplað yfir. Hitað undir grillinu á ofninum í nokkrar mínútur þartil farið að taka lit og orðið nokkuð gegnumeldað.

Grænmetið sett allt saman (þarf ekki að afþíða þetta frosna áður en þetta er gert) í skál og sjóðandi vatni hellt yfir. Lok sett á skálina eða plast til að einangra og leyft að standa í nokkrar mínútur. Vatninu hellt af.

Þegar kjúllinn er tilbúin er grænmetinu, skínkunni og sýrða rjómanum bætt við oní eldfasta mótið og kryddað eftir smekk með salt og pipar. Fersku brauðmylsnunni drussað yfir og smá smjöri eða olíu dripplað yfir það. Sett aftur inní ofn þartil brauðmylsnan hefur tekið lit og allt hitnað í gegn (cirka 200 gráður í 15 mín).

Mér fannst engin þörf á að hafa kartöflur eða hrísgrjón með þessum rétt. Stendur alveg fyrir sínu eins og hann er með öllu góða grænmetinu og "crustinu" sem myndast af fersku brauðmylsuninni ofaná.

Tíramísú, svindlútgáfan

2007-04-13T09:53:00.000-07:00

Ég birti þessa uppskrift til heiðurs Hrönn vinkonu sem gerir besta tíramísú í heiminum. Rakst á uppskrift í nýjustu uppkriftabókinni minni að 20 mínútna svindltíramísúi og bara varð að gá hvort það stæðist bragðkröfur okkar Ingó. Sem það gerði vissulega.
Í venjulegu tíramísúi er oftast bæði mascarponeostur og eggjarauður. Í þessu er hvorugt. Þarf ekkert endilega að standa í fleiri klukkustundir inní ísskáp. Og er drullufljótlegt.

Svindltíramísú
fyrir 2 gráðuga fullorðna eða 6 pena og kurteisa ;)

1 askja létt rjómaostur (Philadelphia)
1,5 dl þeytirjómi
3-4 msk sykur (upprunalega uppskriftin sagði 5 en það var ofaukið að mínu mati)
Þetta þrennt þeytt saman þartil hæfilega stíft

Instantkaffi gjört og kælt.

Þunnt lag af rjómaostablöndunni er sett í hæfilega stórt form. Botninn á tíramísúkexinu (kallast ladyfingers) er dýft í kaffið og raðað í formið. Svo eru gerð svona lög af kexi og rjómaosti til víxls. Látið standa í kæli þartil á að bera fram og kakódufti er dustað yfir rétt í blálokin.

Lambahakk með indversku ívafi

2007-03-05T09:20:00.000-08:00

Lambahakk er að mínu mati (eins og ég hef áður nefnt) töluvert betra en nautahakk. Bragðmeira einhvernvegin og ofboðslega gott í allskyns indverska rétti.
Þessi uppskrift birtist í Svenska Dagbladet en kemur víst upprunalega af www.tasteline.com
Ekki mikið af hráefnum í réttinum en hann kom alveg hressilega á óvart og einsog venjulega át litli grallarinn á sig gat ;)

Lambahak með indversku ívafi
f. fjóra

4-500 gr lambahakk
2 dl búlgur eða cous cous, eldað skv. leiðbeiningum á pakkanum
1/2 blómkálshaus, bútaður niður í litla vendi
2 gulrætur skornar í þunnar sneiðar
2 dl sneiddur púrrlaukur
2 msk smjör
2 tsk Garam Masala
1 tsk gurkemeja (Turmerick)
Salt og pipar

Hakkið steikt á pönnu uppúr smjöri og kryddað með Garam Masala og Gurkemeja. Grænmetinu bætt við, saltað og piprað og leyft að malla með loki á í 5 mín eða þartil grænmetið er hæfilega eldað að smekk (sumir vilja meira crunchy og þá er bara að minnka eldunartímann). Couscousið/Bulgurinn bætt við útá pönnuna.

Jógúrtsósa
2 dl matreiðslujógúrt eða önnur hrein jógúrt
1 (eða fleiri) hvítlauksrif
2 tsk fersk hökkuð mynta
Allt blandað saman og geymt í ísskáp þartil aðalrétturinn er tilbúin.

Borið fram með ferskum kóríander stráðum yfir og með jógúrtsósuslettu á hverju disk.

For- og eftirréttur gamlárskvölds

2007-01-02T11:55:00.000-08:00

Þessir tveir réttir voru svo últrasúpergóðir að ég bara VERÐ að pósta þeim upp hingað. Verst að ég náði ekki að taka myndir af herlegheitunum. Var algjört "oooohhh" sem endaði á "mmmmm". Verður endurtekið í næsta fínfína matarboði.

Hörpuskelfiskur með klementínum
(úr Good Food, jan 05)
f. 4
9 klementínur
2 msk brandy/koníak
örlítið af sykri
smá olía og klípa af smjöri
12 snyrtir hörpuskelfiskar (vöðvinn fjarlægður)
graslaukur til að skreyta með

4 msk þeytirjómi
4 msk mæjónes
sítrónusafi eftir smekk

Undirbúið klementínurnar fyrst; afhýðið þær og skerið svo hvert "lauf" út fyrir sig. Best er að gera þetta yfir skál svo enginn safi fari til spillis. Í lokin eiga 12 heil lauf að vera tilbúin. Geymdar í lokuðu íláti í kæli þartil bera á frammá borð.
Kreistið safan af restinni af klementínunum í skálina. Hitið stóra pönnu og sjóðið niður safann ásamt áfenginu og örlitlum sykri. Vökvinn á að verða sírópskenndur. Geymdur í kæli.
Rjóminn í sósuna er þeyttur og blandað við mæjónesið. Smakkað til með sítrónusafa og kryddið örlítið með salti og pipar. Sósan á að vera þykk. Kælt.
Þetta má allt saman gera með góðum fyrirvara fyrr um daginn.
Rétt áður en bera á fram réttinn er panna hituð, olía og smjör sett á og hörpuskelin steikt. Snúið skelfisknum bara einu sinni á pönnunni, ætti að vera samtals 3 mín samtals á pönnunni eða þartil báðar hliðar eru fallega gylltar. Setjið á eldhúspappír og saltið örlítið.
Á hvern disk eru búnir til 3 matskeiðsstórir "pollar" af rjómamæjósósunni. Einn skelfiskur er settur oní hvern sósupoll og biti af mandarínu þar ofan á. Sírópsslettur settar á diskinn og á bitana. Skreytt með smávegis graslauksbitum.

Bláberjafrauð með berjablöndu og vanillurjóma
(úr SvD)
f. 4
1 dl bláber
4 msk sykur
1,5 dl vatn
1,5 msk kartöflumjöl
3 eggjahvítur
smjör og sykur til að húða formin með
Setjið bláberin í pott ásamt 0,5 dl af vatninu og 2 msk af sykrinum. Hitið að suðu. Puréa (með töfrasprota) þartil orðið að þykkum vökva. Bætið við 1 msk af sykri og hitið aftur að suðu. Blandið saman kartöflumjölinu og 1 dl af köldu vatni. Hellið þessu útí pottinn með bláberjavökvanum og hrærið í á meðan. Hitið aftur þartil þykknar. Leyft að kólna alveg undir loki eða plastfilmu.
Því næst eru eggjahvíturnar stífþeyttar ásamt 1 msk sykri. Helmingnum er blandað hressilega saman við bláberjaþykknið en hinum helmingnum er blandað vaaaarlega saman með sleikju í lokin. Formin (souffléform) eru smurð með smjöri og "sykruð" (sykri hellt í formið og leyft að festast í allar hliðarnar). Frauðblöndunni er bætt í hvert form. Núna er hægt að geyma formin í kæli í nokkrar klukkustundir EÐA sett í frysti ef þarf að geyma lengur. Ef sett eru í frysti þarf bara að taka þau út og geyma í kæli í nokkra klukkustundir áður en hitað og borið fram.
Gerið berjablönduna;
1,5 dl bláber
1,5 dl brómber
3 msk sykur
Allt sett í pott og hitað við meðalhita þartil berin eru sprungin og orðið að hálfgerðri sultu. (í lagi að nota frosin ber) Kælt.
Hitið ofninn að 175° og bakið frauðin í 8-10 mínútur eða þartil þau lyftast vel/rísa uppúr formunum. Þeytið rjóma með smá vanillusykri eða kornum úr hálfri vanillustöng. Frauðin eru svo borin fram heit með berjablöndunni kaldri og rjómanum.

Ofurhversdags; Tacofiskur

2007-01-02T11:43:00.000-08:00

Fékk þessa uppúr Arla uppskriftarbæklingi þarsem gefnar voru "hversdagsuppskriftir fyrir stórfjölskyldur". Þarna var því lofað að börnin yrðu ofsaglöð og ætu allt upp til agna, meira að segja þó þetta væri fiskur. Prófaði þetta í kvöld á börnin þrjú (bara eitt mitt eigið; 1 árs, 11 og 12 ára) og allt fullorðna fólkið. Allir lofuðu í hástert og fatið var sleikt hreint !

Tacofiskur
(uppskrift fyrir fjóra, má auðveldlega tvöfalda)
600 hvítur fiskur (þorskur, ýsa....)
1 tsk salt
2,5 dl matreiðslurjómi
0,5 dl tacosósa (styrkleiki eftir smekk)
2 dl rifinn ostur
ríflega tvær handfyllir tortillaflögur, muldar

Fiskurinn settur í ofnfast mót og saltaður. Rjómanum, tacosósunni og ostinum blandað saman og hellt yfir fiskinn. Tortillaflögurnar dreifðar yfir og hitað í ofni við 225° í 25-30 mín.

Í tilefni jóla: amerískar haframjöls- og rúsínusmákökur

2006-12-22T02:31:00.000-08:00

Þetta eru svona smákökur sem eru stórar... þúveist... stórsmákaka. Ef kakan er gerð minni verður hún þurr og óspennandi, þær bara EIGA að vera pínu seigar og sá árangur næst aðeins með því að gera dáldið veglega klumpa á bökunarpappírnum. Svona golfkúlustærð cirka.
Uppskriftina fann ég eftir ítarlega leit á netinu fyrir allmörgum árum síðan. Margar mismunandi aðferðir og innihald í boði en eftir samanburð og pælingar miklar varð þessi uppskrift "mín" ;)
Gleðileg jól !

Amerískar Oatmeal-Raisin Cookies
3 egg, léttþeytt
2,4 dl rúsínur
1 1/2 tsk vanilludropar
Þessu þrennu er blandað saman og látið standa í stofuhita í 1 klst

2,4 dl smjör (cirka 220 gr)
1,7 dl púðusykur
1,7 dl sykur
Hrært vel saman þartil verður að jafnri smjörblöndu

6 dl hveiti
1/2 tsk salt
1 tsk bökunarsódi
1 tsk kanil
Blandað saman við smjörblönduna og eggja-rúsínuhrærunni bætt við

4,8 dl haframjöl
Hrært saman við allt að lokum

Ágætlega stórar "klessur" eru settar á bökunarpappír með skeið. Má vera dálítið á milli hverrar kökur og gerðar örlítið minni en lokaútkoman á að vera því að þær fletjast út meðan þær eru að bakast. Bakað við 180° í 10-12 mínútur eða þartil fullbakaðar og farnar að taka lit.

Svínalund með ætiþistlum

2006-12-07T01:20:00.000-08:00

Svínalundin er voða vinsæl hérna í Svíþjóð. Ýmist heilsteikt eða skorin í þunnar sneiðar. Finnst oft erfitt að fá kjötið til að verða almennilega meyrt en það tókst ágætlega í gær með þessari uppskrift. Býst við að eitt aðaldæmið sé að steikja kjötið passlega lengi.

Svínalund með ætiþistlum
(úr Arla bæklingi)

600 gramma svínalund, skorin í 2 cm þykkar sneiðar sem eru svo reistar uppá rönd (endinn sem skorin var snúi upp) og klesstar aðeins niður.
smjör til steikingar, salt og pipar

2 hvítlauksrif, kramin
2 dl sýrður rjómi (15%)
2 msk fljótandi kálfakraftur (kalv-fond)
1 tsk soja
2 tsk timjan
1 dós ætiþistlar, skornir í helminga

Svínalundabitarnir steiktir á pönnu þartil fallega brúnir uppúr smjöri, kryddaðir vel með salti og pipar. Sýrða rjómanum, krafti, soja og timjan blandað saman í skál.
Bitarnir teknir uppúr pönnunni og hvítlauknum leyft að hitna aðeins á pönnunni. Sýrða rjómablöndunni og ætiþistlunum hellt útá og hrært þartil verður að sósuþykkni. Kjötbitunum bætt við og öllu leyft að malla smástund til viðbótar, 3-4 mín eða svo. Borið fram með hrísgrjónum.

Allt er til á netinu....

2006-11-30T02:48:00.000-08:00

Ég get eytt heilu og hálfu dögunum í að skoða uppskriftir og fyllast innblæstri á góðum uppskriftasíðum á netinu. Mínar uppáhalds eru;
www.tasteline.com
www.epicurious.com
www.bbcgoodfood.com
www.foodtv.com

aðrar áhugaverðar;
www.sunmaid.com
www.mrschengs.com
www.arla.se

Lofa að bæta við þennan lista ef ég rekst á nýjar síður !

Líbanskt kryddaðar kjötbollur með kjúklingabaunum

2006-11-29T02:26:00.000-08:00

Hilmir hakkaði þessar í sig sem mest hann mátti... kjúklingabaunirnar gera bollurnar extra djúsi og þær voru sko ekki síðri daginn eftir sem afgangar.

Líbanskt kryddaðar kjötbollur
(úr Vivokúnnablaði)

500 g hakk (lamba best, annars nautahakk)
1 lítill gulur laukur, hakkaður
2 hvítlauksrif
1 dós soðnar kjúklingabaunir
2 msk olía til steikingar eða smjör
2 tsk kúmmin
2 tsk papríkuduft
0,5 tsk kanilduft
örlítill cayennepipar eða chillí
2 msk fljótandi kálfakraftur (fond)
0,5 dl persilja, hakkað
1 egg
salt og pipar

Hitið ofninn í 200 gráður. Fínhakka lauk og hvítlauk. Hella af kjúklingabaununum og skola með köldu vatni. Mauka gróflega með gaffli eða kartöflustappara.
Hita olíu eða smjör á pönnu og léttsteikja laukana, bæta svo við kjúklingabaunastöppunni og kryddunum. Láta allt hitna vel í gegn, cirka 1 mín. Látið kólna og blandið svo með kjöthakkinu. Bætið við kálfakraftinum, hakkaðri persilju, eggi, salti og pipar og mótið í litlar bollur. Setjið í ofnskúffu og ofnsteikið í 10 mínútur. Þvínæst eru þær steiktar á pönnu uppúr smjöri/olíu þartil þær fá góðan lit. Með því að ofnsteikja halda þær betur formi heldur en ef maður steikir strax á pönnu.

Bera fram með hrísgrjónum og myntujógúrt (hrein jógúrt, miiiikið af ferskri myntu, salt og pipar).

Pasta með graskeri (pumpkin)

2006-11-07T01:19:00.000-08:00

Hafði aldrei á ævinni borðað grasker svo ég stóðst ekki mátið að þreyta frumraun í a) graskerseldamennsku og b) elda uppskrift af dagatali (þess ber að geta að dagatalið er frá Good Food svo ég taldi það nokkuð áreiðanlegt og líklegt til árangurs).
Tek fram að þetta er engin dietuppskrift enda ómælt magn af smjöri þarna en ég minnkaði magnið þó til muna og held að megi gera enn betur í næstu umferð. Það lá við að við sleiktum pottinn eftir að hafa étið yfir okkur af þessu ! Hilmir fékk ekki einusinni að smakka....

Pasta með graskeri, furuhnetum og geitarosti
(úr Good Food)

300 gr af graskeri, kjarnhreinsað, afhnýtt og niðurskorið í cirka 2 cm bita
olía, salt og pipar
Ferskt pasta af einhverri góðri týpu, magn fyrir 3-4
85 gr af smjöri (ég minnkaði niður í 50 gr án vandræða)
50 gr furuhnetur
4-5 msk smátt söxuð fersk salvía (verður að vera fersk!)
180 gr geitarostur

Graskersbitarnir olíubornir örlítið, saltaðir og pipraðir vel og bakaðir í ofni við 200°c í 30 mín eða þartil mjúkir.
Pastað soðið og látið renna af því, geyma þó cirka 1 bolla af vatninu undan því og sett til hliðar.
Smjörið brætt á pönnu við meðalhita og furuhnetum og salvíu bætt út í. Steikt þartil smjörið er orðið örlítið brúnt, furuhneturnar farnar að taka lit og salvían að verða stökk. Þá er smjörblöndunni bætt við pastað í pottinum ásamt graskersbitunum og geitarostinum. Hrært þartil osturinn er farin að bráðna og mynda sósu. Nota vatnið undan pastasoðinu til að bleyta meira upp í ef þykir þurfa.
Piprað.

Saffranhrísgrjón með kjúkling og grænmeti

2006-09-25T11:04:00.000-07:00

Enn og aftur kjúklingur hér... fæ ekki nóg af honum... borða kjúlla töluvert oftari en rautt kjöt og enn oftar en fisk *gúlp*. Tek mig á í fiskmálefnunum fljótlega... niðurstöður birtar hér ;)

Saffranhrísgrjón með kjúkling og grænmeti (úr LagaLätt 8/2006)

2 dl hrísgrjón
1/2 poki saffran (cirka ein væn fingurklípa)
3 rauðar papríkur
1 gúrka
1 knippi persilja (má sleppa)
2 fersk mangó skorin í bita (er hægt að kaupa frosið!)

Dressing:
safinn af 1 lime
3 msk olía
salt + pipar

Kjúklingurinn:
4 kjúklingabringur
2 msk olía
1 msk malið cummin (EKKI kúmen einsog ég hélt einusinni)
1 1/2 tsk salt

Kveikið á ofninum á 250° heitt grill (yfirhiti)
Sjóðið hrísgrjónin ásamt saffraninu skv. leiðbeiningum á pakka... semsagt bara einsog venjulega ;)
Skerið úr kjarnann úr papríkunum og setjið á bökunarpappír á ofnskúffu inní ofninn. Leyfið að grillast í 10 mín efst í ofni eða þartil farið að taka lit. Þá er hægt að taka þær út, setja í plastpoka og loka fyrir þartil kólnar aðeins. Svo tekið úr pokanum og þá er auðveldlega hægt að draga hýðið af... í ljós kemur unaðsleg og mjúk papríkan sem slær engu við í bragði.
Skerið gúrkuna í litla bita og blandið saman innihaldinu fyrir dressinguna.
Skerið kjúklingabringurnar í 5-7 bita hver og steikið uppúr olíunni. Kryddið með cummin og salti.
Blandið öllu saman í stórt fat; hrísgrjón, grænmeti, dressing og kjúlli.

Sveitó kjúlli með eplum

2006-09-25T10:35:00.000-07:00

Þegar ég segi sveitó þá meina ég sænskt sveitó... og sænskt sveitó er epli og rótargrænmeti. Eplabragðið kom mér á óvart, gerði sósuna ferlega góða, frísklega og jömmí.

Sveitó "Lantig" kjúklingur með eplum (úr LagaLätt 08/2006)

1 heill kjúklingur, hlutaður niður... nú eða bara kjúklingabringur ef mar er extra latur og það eru bringur á tilboði einhverstaðar ;)
1 msk olía
2 epli
4 sellerístilkar (ég notaði fennel í staðinn með fínum árangri)
12 meðalstórir skallottlaukar
1 msk olía
2 dl eplasafi (þykkni)
1 tsk timjan
3 lárviðarblöð
1 tsk salt og smá pipar
1 dl matreiðslurjómi

Kveikið á ofni; 200° . Brúnið kjúklingin (hlutana eða bringurnar) á ölum hliðum þartil gyllt uppúr olíu og leggið svo í ofnhelt fat.
Skerið eplin í báta og kjarnhreinsið. Skera selleríið í 3 cm langa bita og leggið ásamt eplunum í fatið.
Afhýðið og helmingið skallottlaukinn. Steikið í olíu á pönnu og bætið svo við eplasafanum, timjan, lárviðarlaufum og látið malla smástund. Hellið svo öllu þessu yfir kjúklingin í fatinu. Saltið og piprið. Breiðið álpappír yfir fatið og setjið í miðjan ofninn í 30 mínútur. Takið þá af álpappírinn og hellið matreiðslurjómanum í. Sett aftur inn í ofn í 10 mín til viðbótar eða þartil kjúklingurinn er fulleldaður.... gæti þurft að vera lengur ef stórir bitar.
Borið fram með kartöflumús og jafnvel smá salati.

Hversdags; grænmetispasta með kjúkling

2006-08-29T06:20:00.000-07:00

Fann þessa uppskrift í hverfisblaðinu og þarsem innihaldið stemmdi ágætlega við innihald ísskápsins skellti ég mér á það. Kom mér á óvart hvað geitarosturinn gerir mikið fyrir pastað.

Grænmetispasta með kjúkling og geitarosti.
(magn fer, líkt og fyrri daga, nokkurnvegin eftir smekk og þörf)

Kjúllabringur eldaðar á hefðbundin hátt (brúnaðar á báðum hliðum uppúr örlitlu smjöri, salt og pipar, inní ofn á 150° þartil fulleldaðar)

Pasta soðið

Zuccini (1 stk), rauðlaukur (1 stk), hvítlaukur (2 rif) og papríka (1 stk) skorin í sneiðar og báta. Steikt uppúr örlítillri olíu þartil mýkist. Tómötum í dós hellt útá og leyft að malla smástund. Saltað og piprað. Pastainu er svo blandað saman við grænmetismallið og smá basilíku og geitarostur blandað við.

Borið fram með kjúklingabringunum.